Lafaek News—Assosiasaun Jornalista Timor Lorosa’e (AJTL) konsidera Ministériu Públiku (MP) hatauk jornalista ho media sira iha Timor Leste atu divulga informasaun ba interese públiku nian.
AJTL lansa konferénsia imprensa relasaun ho karta notifikasaun husi ministériu públiku hasoru jornalisra husi media online Hatutan.com, Rogério Pereira Cárceres, publika notisia kona-ba Prokuradoria Jerál Repúblika Alfonso Lopes ne’ebé deskonfia uza estadu nia osan hodi viajen privadu ba Lisboa Portugal no ameasa husi eis-seminarista no superior semináriu Mino Nossa Señora de Fátima (SENOFA) ne’ebé publika iha media online ho naran Diligente kona-ba “Maus Tratus”, agresaun no fornesimentu hahán ladi’ak ne’ebé mosu iha SENOFA nia laran.
Prezidente Asosiasaun Jornalista Timor Lorosa’e, Zevonia Vieira afirma, AJTL haree katak aktu hirak ne’e la reflete valór demokrasia no la reflete prinsípiu direitu demokrátiku ne’ebé Timor-Leste opta nu’udar filosófia moris país nian, tanba ida-ne’e impede no hatauk jornalista no mídia atu hato’o informasaun kona-ba violasaun direitus umanus, transparénsia no kontabilidade ne’ebé parte ida husi prinsípiu boa-governasaun no valór demokrasia nian.
Iha konferensia imprensa ne’e AJTL kestiona aktu legal ne’ebé ministéiru públiku foti hasoru jornalista sira, ne’e hanesan amesa hasoru mós liberdade imprensa no liberdade espresaun iha pais demokrátiku.
“AJTL mós haree katak aktu legál ne’ebé MP foti hasoru Hatutan.com no SENOFA nia ameasa hasoru Mídia Online Diligente nu’udar aktu tentativa no ameasa hasoru liberdade imprensa no liberdade espresaun iha país demokrátiku ida-ne’e no aktu hirak ne’e sei afeita index ranking liberdade imprensa TOP 10 (top ten) ne’ebé Timor-Leste dadauk ne’e atinje, notifikasaun no ameasa hasoru jornalista no mídia iha país demokrátiku ida-ne’e la’ós dalan demokrátiku tamba notisia sira ne’ebé Hatutan.com no Diligente publika nu’udar produtu jornalístiku, la’ós aktu krime no ida-ne’e nu’udar parte ida husi papél mídia kontrolu sosiál hodi hakunu sidadaun sira nia direitu atu asesu informasaun loos no kredivél kona-ba transparénsia, kontabilidade no direitu umanu,” katak Zevonia.
Iha sorin seluk, jornalista Media Online Diligente, Eduardo da Silva, relata katak notisia ne’ebé Diligente hatun bainhira halo fali konfirmasaun produtu jornalistiku iha Konsellu Imprensa la viola kode étika, maibé kazu ne’eba ona tribunal media Diligente prontu kolabora
“Dezde ami konfirma iha produtu jornalistiku iha konsellu imprensa la viola kode etika no lei komunika sosial no mós buat hotu prense rekezitus ita moris iha nasaun demokrátiku ne’ebé prosesu kaju ne’e bá tribunal ami prontu kolabora,” katak Eduardo da Silva.
Iha fatin hanesan, Jornalista media Hatutan.com, Regério Pereira Cárceres katak, notifikasaun ne’ebé jornalista Hatutan no Diligente hasoru liga ho notifikasaun husi Ministru Públiku liga ho prokurador jerál nia viajen ba Portugál ne’e dadus ne’ebé jornalista rekoila hodi públika iha media Online hatutan.com.
“Atu hateten katak reportajen ne’ebé maka hatutan.com halo liga ho prokurador jerál halo viajen ba Portugál ne’e hanoin buat hotu tuir hela prinsipu aniversal jornalista nian, dalan ne’ebé ita halo ne’e hodi hetan asesu ba informasaun no dadus ne’ebé maka rekoila no públika iha hatutan.com, maibé tanba hetan notifikasaun husi Ministru Públiku tanba konteudu notifikasaun ne’e ho notifikasaun komperensia hodi nune bolu ami ba esklarese kona-ba dadus ne’e,” katak jornalista Hatutan.Com Rogério Pereira Cárceres.
Jornalista : Alsino Madeira
Editor : Agapito de Deus
