Lafaek News-Reprezentante Komandante Jerál Polísia Nasionál Timor-Leste (PNTL), Superintendente Xefe, Afonso dos Santos, husu husu Bobonaru-oan sira tenke estuda hamroin naran Timor Leste, labele hanoin tama sai ilegal iha fronteira.
“Ha’u lakohi rona bunak-oan pasajen iha fonteira liu husi dalan ilegal, ha’u la bandu, maibé estadu mak bandu tan ne’e husu imi atu estuda makas hanoin ba futuru hamorin Timor-Leste nia naran,” Superintendente Xefe Afonso liu husi diskursu iha suku Zildapil Bobonaru, kuarta 04/08/2021.
Superintendente Xefe polísia ne’e esplika, pasajen ba Indonézia ka mai Timor-Leste bainhira liu husi dalan legal ne’e diak, maibé halo pasajen liu husi dalan ilegal ne’e kontra lei no sei lori moras COVID-19 mai iha Timor.
“Ita boot sira mak futuru nasaun nian, tan nee nafatin aprende iha uma maske ita hasoru situasaun hanesan nee, laos tama sai illegal iha fronteira depois lori moras aat mai Timor-Leste ida nee parte seguransa sei la tolera ita boot sira,” Superintendente Xefe Afonso esplika.
Nia afirma, nasaun Timor-Leste adopta seguransa integradu tuir lei seguransa nasional iha forsa defeza maka Falintin Forsa Defeza Timor-Leste (F-FDTL), Polisia Nasional Timor-Leste (PNTL), no mos sidadaun tomak iha dever atu fo apoiu halo seguransa ba pais Timor-Leste.
“Ema hotu-hotu iha dever atu kontribui ba seguransa iha ita nia nasaun liberdade ida nee atu ita bele evita ema tama sai tuir dalan ilegal,” dehan Reprezentante Komandante Jerál PNTL, Superintendente Xefe Afonso Dos Santos
Jornalista : Orlando Magno
Editór : Agapito de Deus
