Lafaek News-Mídia Online Lafaek News husu deskulpa ba família matebian no leitóres sira hotu katak, nutisia ne’ebé mak lafaeknews.com hatun ho titlu “família sira tula mate isin ho de’it karreta gran max ba Bobonaru” bazea ba fontes husi autoridade seguransa sira.
Tan ne’e, mak lafaek news husu deskulpa ba públiku liu-liu família matebian sira, tanba lafaek news lahalo konfirmasaun ho família matebian sira.
Nune’e, Lafaek News tenta konfirma ho reprezentante Família Matebian, Domingos da Cruz, deklara katak kaixaun ne’ebé tula iha karreta Gran Max mamuk laiha mate isin ida, tanba pesoál seguransa ne’ebé mak fó informasaun dehan tula mate isin ne’e lalos.
Ho razaun hola kaixaun iha Dili, tanba família sira hakarak kaixaun ne’ebé mak kualidae entaun família lubuk ida mak akompaña kaixaun ne’e, kuaze motor 10 no karreta tolu hanesan ne’e mak akompaña kaixaun mamuk ne’e.
“Informasaun ne’ebé hato’o husi autoridade segurasan ne’e lalos, tanba ami tula de’it kaixaun mamuk mak lori ba munisípiu Bobonaru tanba mate isin iha hela foho,” deklara reprezentante Família Matebian, Domingos da Cruz Lafaek News Liu husi via telefone foin lalais ne’e.
Kareta hirak ne’e hetan lisensa viajen husi Sentru Intengradu Jestaun Krize (SIJK), tanba ne’e too iha auto-stop iha Tasi Tolu, familia ida tuun husi karreta hodi hatudu Gia de marsa ba polísia sira hafoin hetan autorizasaun hodi sai husi sidade Dili ba munisípiu Bobonaru.
Tuir deklarasaun husi autoridade seguransa katak, mate isin mak tula iha karreta Gran Max, maibé konfirma ho família matebian sira katak, kaixaun ne’ebé tula husi dili ba munisípiu Bobonaru ne’e mamuk.
Ho observasaun lafaek news nian iha tereinu nota katak, regulamentu husi Sentru Integradu Jestaun Krize ladun rigorozu tanba família matebian sira kuaze 20 resin mak akompaña kaixaun mamuk ba munisípiu Bobonaru la kumpre distánsia sosiál.
Jornalista : Acacio Pinto
Editór : Floriano Soares
