Lafaek News—Koordenadór Forsas Tarefas ba Prevensaun no Mitigasaun Surtu Covid-19, Rui Maria de Araújo, informa, ema ne’ebé seidauk kompriende servisu ekipa konjunta saúde iha terrenu sei insulta no tuda husi grupu balu, maski bele tuda maibé sei la tuda mate atu hala’o kna’ar hodi proteze povu husi risku.
“Ema balun seidauk bele ou seidauk hakarak kompriende sa ida máka ita halo, sei insulta, sei habelar lia falsu, sei tuda ita ho fatuk nafatin, imi bele tuda ami maibe imi sei la tuda mate ami nia vontade atu hala’o ami nia kna’ar,” dehan kordenadór forsa tarefas ba prevensaun no mitigasaun surtu covid-19, Rui Maria de Araújo ba jornalista sira liu husi Meeting Zoom, Segunda (15/03/2021)
Rui esklarese dezafiu importante máka buka identifika kontaktu-besik husi kazu pozitivu sira hotu, foti amostra, impoin kuarentena ba sira ne’ebé iha risku, izola sira ne’ebé pozitivu, maski asimtomátiku, atu nune’e labele hada’et tutan ba ema seluk, nune’e kumpre nafatin misaun hodi proteje povu.
“Ingratidaun ka falta gratidaun, halo fuan moras, maibé fuan moras labele sai obstakulu atu kumpre ita nia misaun importante hodi proteje ita nia komunidade, ita nia povu, liu-liu sira ne’ebé vulnerável liu,” Rui reafirma.
Nune’e, halo apelu espesiál ida ba profisionais saúde sira, ho mós sira husi profisaun seluk ne’ebé hamriik iha liña oin kedas, husi kombate hasoru surtu Covid-19, ne’ebé naklekar da-daun iha Timor-Leste nia laran.
Alende ne’e mós, Arsebispu Dioseze Dili, Don Virgílio do Carmo da Silva, SDB, nia parte sente la kontente ho hahalok ka reasaun ema sira nian ne’ebé hasoru pesoal saúde sira, nune’e husu ema hotu nia kolaborasaun hodi kombate Covid-19.
“Husu ita hotu nia pasiensia no kolaborasaun masimu ho pesoal saúde sira, ita hotu hamutuk mak bele fo solusaun ba situasaun ida ne’e, ema ida de’it la bele atu kombate virus ne’e, presiza ita hotu nia kolaborasaun atu bele kombate virus Corona ne’e iha ita nia nasaun,” dehan Arsebispu Dioseze Dili.
Entretantu realidade hautudu foin lalais ne’e akontese ba ekipa ambulansia atu evakua paseinte Covid-19 iha área Kaikoli maibé komunidade halo reasaun kontra no tuda hasoru karreta ambulansia, inklui mós akontese iha aldeia 03, suku Fatuhada, postu administrativu Don Aleixo, ho kasu ne’ebe hanesan.
Jornalista : Sandi Belo
Asisten Editór : Pedro de Almeida
