Lafaek News–Maubisse, 05 Agusto 2026. Lia na’in sira husi Suku Maulau postu administrativu Maubisse, munisipiu Ainaro hala’o serimonia kultural ‘Sudi Ahi’ nu’udar loke dalan ba atividade Komemorasaun no Prosesu Rekonsiliasaun Timor-oan ba Konflitu pasadu Interna 1975 entre Simpatizante FRETILIN no UDT ne’ebé akontese iha Maulau iha tinan 1975.
Serimonia kultural lidera husi lia na’in Felix Fatima Martins, Lorenço de Araújo no Antonio Salsinha. Serimonia ne’e hetan akompañamentu husi Centro Nacional Chega!I.P hamutuk ho Grupu Traballu Prosesu Rekonsiliasaun Timoroan (GT-PRT), Autoridade Lokal, Komunidade, Juventude, Estudante no entidade sira.
Sasan sira ne’ebé uza iha prosesu ne’e mak hanesan, bua, malus, tua, osan mean, osan mutin, fahi, manu no seluk tan. Depois lia na’in sira halo dadolin, hamulak no haree rezultadu urat manu no fahi nian hatudu sinal di’ak katak dalan nakloke ona ba prosesu rekonsiliasaun nahe biti boot no simu malu nu’udar maun alin hodi haluha pasadu, hateke ba oin hamutuk halo dezenvolvimentu.
Entertantu, atividade ne’e realiza iha Sede Suku Maulau no hetan apoiu husi Centro Nacional Chega!I.P no organiza husi komunidade Suku Maulau, postu adminisrtativu Maubisse munisipiu Ainaro, atividade ne’e hosi inisiu too remata la’o ho di’ak tanba hetan partisipasaun masimu hosi komunidade suku Maulau Maubisse. (*)
