Lafaek News—Akontese ema deskoñesidu baku rahun gruta nain feto Maded Biheturema postu administativu Maubisse munisípiu Ainaro, hodi foti osan esmola iha kofre laran.
Lucas Martins Lopes nudar ema ida ne’ebé inisia harii gruta Maded Biheturema haktuir, nia rasik seidauk hatene montante osan esmola iha kofre laran, no ema deskoñesidu na’ok iha tempu kalan iha loron 21 fulan Janeiru 2024.
“Ema deskuiñesidu ne’ebé maka baku rahun no Subu Kofre Promesa nian ne’e ami la hatene no akontesimentu ne’e hori kalan loron 21 fulan Janeiru 2024, depois ohin dader kolega mai hasa’e orasaun haree ba hanesan ne’e hela,” Inisatór ba Gruta MADED Lucas Martins Lopes, ba Radio Mauloco Maubisse, iha fatin akontesimentu, 22/01/2024.
Lucas sente triste hodi hateten, gruta refere hahú husi Inaugurasaun too ohin loron seidauk hasai osan esmola ne’ebé sarani vizitantes sira rai iha kofre-laran, tan ne’e seidauk hatene montante osan hira maki ha kofre-laran.
“Iha dader ida ohin ne’e maka ami foin hetan ami prepara atu ba fó hatene ba Amu Pároco ba mós viziñu sira iha ne’e atu toma atensaun ba ida ne’e. Ami senti tristi no laran susar tebes tanba ida ne’e ema hotu nia susar ema hotu nia terus ne’ebé maka mai hasa’e iha fatin ida ne’e, depois ema mai sobu hanesan ne’e ami senti laran susar tebes, tanba ida ne’e atu husu ba Komunidade no Sarani sira ita atensaun ba ida ne’e tanba ho hahalok ida hanesan ne’e hatudu ezemplu ida ne’ebé la diak ona ba ita nia fiar hanesan Sarani,” dehan nia.
iha sorin seluk, Marcelina Espirito Santo hanesan sarani parokia Maubisse, senti triste ho hahalok ema deskuiñesidu ne’ebé sobu nain-feto nia gruta hodi na’ok osan esmola ne’ebé sarani reza mak tau iha kofre-laran.
“Akontesimentu ne’e ha’u senti triste hanesan komunidade e Sarani mós, tanba fatin ida ne’e prepara ba ita hotu sarani Maubisse, ho akontesimentu ida ne’e halo ami fuan moras, tanba fatin ida ne’e ba ema hotu atu mai hasa’e orasaun, hasa’e susar no terus mai hotu iha fatin ida ne’e, maibé ho akontesementu ida mosu hanesan ne’e ha’u núdar komunidade ha’u nia fuan moras e tristi tanba ida ne’e afeita ba ita nia fiar hanesan Sarani. tan ne’e ha’u sujere hela ba komunidade sira hela besik iha mai ita hotu hamutuk fó hanoin ba malu atu hare ba fatin ida ne’ebé maka ohin hetan akontesementu ida ne’e, tanba fatin ne’e fatin sagrada ba ita Maubisse iklui mós ba Munisípiu sira hotu.” Hateten
Jornalista : Marcelina Espirito Santo
Editor : Agapito de Deus
