Lafaek News—Komunidade aldeia Lemorana Suku Dare postu administrativu Vera-Cruz, munisípiu Dili, husu IX Governu Konstitusional harii postu saúde ida besik ba komundiade aldeia Lemorana atu atende moras emerjénsia liu-liu inan isin rua
Razaun hosi ezijénsia komunidade Lemorana atu harii postu saúde iha aldeia refere, tanba tempu udan mota ne’ebé tuun maka’asafeta ba komunidade sira atu ultrapasa ba sentru saúde Vera-Crúz, tanba dalan asesu hosi mota-laran.
“Ami husu governu atu hadia ami nia Estrada inklui harii postu saúde ida besik iha ami aldeia laran atu nune’e bele tulun komunidade sira ne’ebé moras bele halo tratamentu besik, liu-liu inan-isin rua sira bele partus ho di’ak,” dehan komunidade Aldeia Lemorana António da Silva Costa ba Lafaek News, iha kobertura espesial ba komunidade aldeia Lemorana,” 08/05/2026.
António reafirma, iha dia 15/02 2022 liu ba, akontese ba inan-isin rua ida tenke partus iha dalan klaran iha tuku 2:00 OTL dader-madrugada, iha area Kiar-Laran aldeia Lemoran, situasaun ne’e mosu razaun kontaktu ambulánsia atende tarde, inan isin rua ne’e tenta la’o tuun ba mota hodi hein ambulansia, maibé seidauk too mota labarik moris iha dalan.
“Ami nia viziñu ida isin rua, hein de’it oras atu partus, entaun haruka ami kontaktu ambulánsia simu, maibé ambulánsia mai kleur, tanba momentu ne’eba mota mos tuun boot, ami lori mana ne’e tuun ba mota, seidauk too labarik moris iha dalan, oras ida resin mak ambulánsia foin too mai, ami kous de’it mana ho labarik nurak tau iha maka hodi hulan tuun ba mota laran hodi tula ba ambulansia hodi lori ba klinika Bairo-pite,” haktuir abitante António.
Iha sorin seluk, Elvira de Jesus Barros, nudar abitante aldeia Lemorana, hatutan problema ne’ebé komunidade enfrenta da-daun mak Estrada, durante tinan 24 ona, komunidade sira asesu de’it mota laran hanesan Estrada, susar ba labarik sira ne’ebé eskola iha Dili laran hanesan, bainhira udan tau maka’as, labarik sira fila hosi eskola atu fila ba uma difisil, tanba dalan ne’ebé atu ultrapasa tenke liu hosi mota-laran.
“Ami tauk mak labarik sira ne’ebé eskola iha São Mateus Ailok-Laran, udan boot ona mota ne’e tuun maka’s, labarik sira fila hosi eskola atu ba uma la di’ak, sira tenke hein mota para mak labarik sira foin ba uma, inklui kareta ho motor para nakonu de’it iha mota ninin hodi hein mota ne’e bainhira mak para atu sira bele la’o ba uma,” haktuir abitante aldeia Lemorana Elvira de Jesus Barros, ba Lafaek News iha Bairo-Kiar-Laran aldeia Lemorana,” 11/05/2026.
Oscar de Andrade, hanesan eis Xefe Aldeia Lemorana, rekomenda ba IX Governu Konstitusional, atu fo priordade ba setor saúde iha baze, realidade ne’ebé povu kiik sira hasoru iha area rural mak saúde no edukasaun, problema mak komunidade sira labele asesu saúde ho di’ak.
“Ami iha ne’e ba konsulta iha sentru saúde Vera-Cruz Kaikoli, sira ne’ebé sofre moras, ISPA, diarea no inan-isin rua, iha tempu bailoron ami la’o ba di’ak, maibé kuandu udan, komunidade sira moras la’o tun ba sae kareta iha Ailok-laran mak foin ba sentru saúde, se mota ne’e tuun maka’as, ami ba la di’ak, fo impaktu mos ba ami nia oan sira ne’ebé eskola iha Dili-laran,”haktuir Oscar de Andrade.
Tan ne’e, husu govvernu atu tau matan ba komunidade ne’ebé la asesu Estrada, postu saúde no edukasaun, realidade iha aldeia Lemorana komunidade sira la’o de’it hosi mota-laran, udan boot tenke hasusar tebes ba estudante sira atu ba eskola no fila ba uma.
Enkuantu hataan ba preukupasaun ne’e, Xefe aldeia Lemorana haktuir katak nia parte sei ko’alia ho Xefe Suku hodi hato’o proposta ba governu hodi tau prioridade ba asuntu saúde atu ba futuru harii postu saúde iha aldeia Lemorana nune’e komunidade hosi aldeia tolu hanesan aldeia Terus-Nain suku Vila-Verde, aldeia Timor Kmanek suku Bairopité no aldeia Lemorana bele asesu besik postu saúde.
“Primeiru governu tenke hadia uluk ami nia estrada tanba Lemorana ho Terus-Nain dalan mak mota laran ne’e, bainhira udan boot ha’u nia komunidade Lemorana ba mai la di’ak, tenke sae hosi foho leten RTK mak bele tuun fali ba Ailok-laran, kona-ba postu saúde ne’e importante liu ba aldeia Lemorana inklui aldeia RTK ho Terus-Nain, husu governu atu prioridade harii postu saúde besik iha aldeia Lemorana atu bele atende inan-isin rua ou ema moras urjensia sira, bainhira udan susar tebes, liu-liu inan isin rua, sira tenke partus de’it iha uma, komunidade balun moras derepente molok hein ambulansia mai tula, ema ne’e mate ona, tanba estrada mak mota, haktuir Xefe Aldeia Lemorana Alice da Costa ba Lafaek News iha nia rezidénsia Lemorana foin lalais.
Reportajen : Lafaek News
