Lafaek News–tersa, 27/01/2026 – Centro Nasional Chega (CNC) ofisialmente asina Nota Entendementu ho Klibur Sobrevivente Feto PRILAMPU, objetivu mak servisu hamutuk implementa rekomendasaun husi relatorio Chega no PMAS, hodi apoiu sobrevivente feto.
Diretor CNC, Hugo Maria Fernandes, hatete katak akordu ne’e importante tebes ba reforsa malu iha desenvolvementu institusional no implementasaun programa sira. “Iha nota Entendemento ida nee, ita sei tulun malu iha desenvolve institusional, no apoio implementasaun atividade hanesan rejista no atualiza baze dadus vitima violasaun direitu umanus pasadu,” nia dehan.
Nia hatete tan, “Nota Entendemento ida ne’e sei fahe kapasidade ba desenvolvementu institusional ba parte rua, no sei tulun malu iha implementa rekomendasaun husi relatorio Chega no PMAS.”
Presidente PRILAMPU, Maria Isabel Jesus da Silva, agradese ba CNC no hatete katak akordu ne’e sei reforsa klibur sobrevivente feto PRILAMPU iha programa tuir mai. “Agradese tebes ba Centro Nasional Cega ne’ebe atende ami nia pedidu, nune bele reforsa ami nia prejensa klibur sobrevivente feto PRILAMPU 1974 to iha 1999,” nia haktuir.
Akordu ne’e sei dura ba tinan 4 no sei fasilita dezenvolvimentu kapasidade institusional, apoio finansa, no jestaun administrativu ba PRILAMPU. Objetivu mak hodi apoio sobrevivente feto PRILAMPU no reforsa klibur sobrevivente sira iha Timor-Leste.
jornalista : Maria Jose de Jesus.
