Lafaek News—Faluk Luciana Inamuk sente laran kmaan wainira iha loron domingu 15/06/2025, teki-teki Januario Soares ho nia ekipa mosu iha faluk ne’e nia odamatan, ho nesesidade oi-oin, hosi vizita ne’e kasu kedan susar terus ne’ebé inan faluk Luciana sente durante tinan 20 resin.
Faluk Luciana Inamuk hosi postu administrativu Laklubar munisipiu Manatuto, hela iha aldeia Lemorana suku Dare munisipiu Dili, iha oan nain rua feto no mane, no feto forma ona uma kain keta, nune’e oan mane ida mak hamutuk ho nia, laiha rendimentu loro-loron, dala ruma kabun hamlaha hosi dader too kalan.
ho tulun ne’ebé Januario oferese hanesan foos, mina, supermie, ropa no seluk tan, hodi entrega ba faluk Inamuc, simu ho kontente too hamonu mata-wen, nune’e fo lia-fuan ida ba Januario katak “ita boot mak maromak nia belun nia sei loke dalan no tulun ita boot nia saúde di’ak hodi kontinua tulun maluk kbiit laek sira seluk,”
“Agradese bele ajuda ona ha’u, ho sasan hirak ne’e fiar katak maromak sei akompanha nafatin imi, obrigada ba imi nia diak,” Faluk Luciana Inamuk nia lia fuan ikus ba Januario ho ninia ekipa wainhira atu hakat fali ba faluk seluk nia uma hodi kontinua fo tulun.
Iha atividade tulun malu ne’e, Januario Soares fo hanoin ba media Lafaek News atu kontinua identifika inan-aman sira liu-liu faluk no oan kiak sira ne’ebé moris iha situasaun difisil atu bele lolo-liman hamutuk hodi tulun malu.
“Ita fo tulun ba mak inan sira no ama faluk sira, ne’e mak sai hanesan osan mean ida tanba ne’e tenki haree didi’ak faluk sira no ema difesensia sira ne’e,” Januario espresa.
Januario hatutan, hanesan Timor oan, tau matan ba katuas no ferik sira ne’ebé moris hasoru situasaun oi-oin iha rai Timor ne’e, ida ne’e mak Timor oan hotu nia esperansa, katak Timor iha nia istoria moruk no midar, hosi istoria moruk ne’ebe inan aman sira sente mak ohin loron rai Timor hetan Liberdade.
“Ita tenki haree ema sira hanesan ne’e tanba sira mak hanesan osan mean ida tanba ne’e tenki ajuda sira tuir kbiit ne’ebe ita maske la barak maske la uituan, tanba ne’e tenki ajuda,”nia hateten
Iha domin dadeer ne’e kedan, Januario ho nia ekipa hamutuk ho jornalista Lafaek News la’o sa’e kedan ba foho lolon suku Dare okos hodi tau matan fali ba avo Sicu ne’ebé moris mesak iha laletek ne’e, hodi fo tulun aihan no ropa inklui nesesidade seluk tan.
Jornalista : Maria José de Jesus
