Lafaek News—Aman kbi’it laek Afonso Maia orijen husi munisípiu Bobonaro Postu Administrativu Balibo Suku Leo-Hitu Aldeia-Mohan, ba da-daun hela iha barraka oan ida nia okos iha parte Ponte Comoro III parte aldeia Moris-Foun, suku Comoro munisípiu Dili hodi pineira rai-henek buka osan sustenta moris ho haknaok foos lata ida ka rua hodi hatutan moris.
Afonso Maia moris mesak haketak malu ho maun alin nain tolu, mane nain ida ho feto nain rua, Afonso nudar oan datoluk husi maun alin nain haat ne’e, nia moris ho triste ba rendimentu hosi Rai-Henek ne’e, semana rua ou semana tolu mak foin hetan osan dolar 10, sorte di’ak dolar 20, dala ruma mos semana haat nia laran laiha rendimentu, iha fatin da-daun ne’ebe nia hela ba parte autoridade lokal laiha konesimentu ba nia, tanba durante kbiit laek ne’e hela iha fatin refere nia rasik seidauk aprezenta an ba xefe aldeia ho xefe suku Comoro.
Afonso hela iha barraka oan ida hatuur besik kedan mota ninin Comoro area ponte III nian no fatin ne’e tama iha aldeia Moris-Foun suku Comoro, no barraka oan ne’e naroman iha tempu loron, kalan nakukun tanba laiha eletrisidade dezde nia harii baraka iha tinan 2019 too ohin loron, maske hakarak maibé osan mak laiha atu sosa fiu hodi dada eletrisidade ba nia barraka oan ne’e
“Ha’u hetan osan husi pineira rai-henek loron ida sorte di’ak ha’u hetan dolar 10, osan ne’e ha’u gasta ba han hemu de’i,t dala ruma fos laiha no osan mos laiha, tanba rai-henek ema la sosa, tanba iha mota laran ne’eba la’os ha’u mesak mak pineira rai-henek, iha maluk barak, sé maromak tulun ha’u hetan dolar 10, osan ne’e sosa fos lata rua, lilin kaixa ida ho kafe no masin-midar hodi hatutan netik ha’u nia iis moris loron-loron,” Afonso Maia haktuir nia esperiénsia moris ba Lafaek News, iha nia barraka okos mota ninin aldeia Moris-Foun suku Comoro postu Dom Aleixo Dili, 27/03/2025
Dezde 2019 too agora, kbiit laek ne’e seidauk aprezenta-an iha autoridade local sira iha suku Comoro nia ukun, tanba ne’e, iha akontesimentu inundasaun 4 de Abril, mota sobu tiha nia uma barraka oan iha mota ninin, maibé laiha autoridade local ou parte relevante sira tau matan ba Afonso Maia, ho nune’e Afonso esforsu hodi harii fali barraka ne’ebé didin ho kalen feruzen sira hodi nia hela too ohin loron hodi buka moris husi rai-henek mota Comoro.
“Iha momentu ne’eba ha’u osan laiha, ha’u hola tutan kalen husi viziñu sira rai mos laiha uma kona eviksaun hotu hau iha manu nain 4 aman 3 no inan hau sai mos ladiak hau atu lori ba nebe mai mak sobu tia uma ne’e loos ona buka kost de’it,” Afonso haktuir ba Lafaek News.
Ikus ne’e, Afonso nia barraka oan tama mos iha lista evikasaun, maibé laiha indimnizasaun hosi governu, tanba kbiit laek ne’e rasik laiha kartaun eleitoral, nune’e autoridade local hosi aldeia refere la rekoñese faluk Afonso Maia nia prezensa hosi tinan 2019 too ohin loron.
Entretantu antes ne’e Afonso nia uma hetan inundasaun bainhira akontese udan bo’ot iha tinan 2021 liu ba hodi resulta sasan uma laran mota lori hotu,no husi ne’e kedas Afonso hela de’it faru tahan ida ho kalxa tahan rua too ohin loron.
Uma ne’e Afonso hela kulixaun ne’ebe malahuk ho tahu maran no nahe ho triplek hodi uza ba deskansa, Afonso mos laiha ropa atu troka ba mai, uza de’it kalsa levis kor ajul ida no faru kor matak ida, iha nia uma Afonso mos hakiak manu inan ida ho oan 5 no manu naton tolu, animal sira ne’e nia lori tutuir ba fatin pinera rai-henek tanba tauk lakon.
Jornalista Magan : Domingas Beto Sequeira.
Editor : Agapito de Deus
