Lafaek News—Família sira husi Proklamadór Saudozu Francisco Xavier do Amaral, reklama uluk iha tempu luta família sai vítima no ohin indepénsia familia kontinua vítima ba prosesu dezenvolvimentu estrada iha postu Turiscai munisípiu Manufahi.
“Iha baze Ami povu sempre vítima hela de’it vítima ba luta inklui dezenvolvimentu hanesan Estrada ne’ebe agora daudaun rehablitasaun kontinua la’o, maibé sempre aat hela de’it iha tempu udan, tinan barak ona laiha mudansa la hatene tanba saida, ami nia moris tinan ba tinan mak nune’e hela de’it, entaun signifika ami povu vítima ba luta no vítima mos ba dezenvolvimentu iha rai ida ne’e,” Francisco Simões ba Lafaek News iha rezidénsia Proklamador Suku Kaemauk Turiskai, sábadu/18/01/2025.
Francisco Simões hateten, ohin loron ema hotu moris kontente hodi goza valór ukun rasik an, maibé povu kontinua moris iha terus nia laran no seidauk sente didi’ak valor hosi ukun-rasik-an (URA), tanba falta buat barak ne’ebe governu tenke halo atu povu bele moris kontente iha nasaun demokrátiku ida ne’e liu-liu hadia estrada atu povu sira moris bele halo movimentu hodi buka moris no sustenta sira nia uma laran.
Iha biban ne’e mos Xefe Suku Kaemauk Manuel Mendonca Rodriques hateten, rehablitasaun estrada foin hahú halo liu hosi orsamentu programa PNDS nian iha tinan 2024, maibé komunidade sira ne’ebe servisu iha rehablitasaun estrada refere labele hetan osan, so úniku Badaen ho Pemborong mak bele hetan osan, ho razaun estadu redus orsamentu ba programa PNDS ho de’it montante 28.000 ba kontratu rehablitasaun.
“Ita ko’alia kona-ba dezenvolvimentu estrada iha suku ne’e hanesan halo rehabilitasaun ba estrada sira ne’ebé eziste iha suku ne’e to agora osan ne’e estado radus tiha ba 28.000 no komunidade sira ne’ebé servisu labele hetan osan so badaen ho pemborong mak bele hetan, maibé rehabilitasaun estrada kontinua aselera ho neneik liu-liu iha suku ho aldeia sira ne’ebe perténsia ba postu administrativu Turiscai Munisípiu Manufahi,” xefe suku ne’e relata.
Xefes uku Kaemauk ne’e mos kestiona mos problema eletrisidade iha suku kaemauk to’o agora aldeia 2 mak seodauk assesu ba eletrisidade hanesan aldeia Sakoa ho Aldeia Lemanu ne’ebe ho total uma kain hamutuk ( 51 ) lima nulu resin ida.
“ Kona ba eletricidade iha suku Kaemauk ne’e aldeia rua mak seidauk asesu ba eletrisidade kompostu husi aldeia Sakoa, uma kain ( 25 ) no aldeia Lemanu uma kain (26), aldeia rua ne’e lokalizadu iha mota-sorin susar atu halo koneksaun ba liña eletrisdade.
Entertantu, total populasaun iha suku Kaemauk hamutuk ema rihun ida atus tolu neen nulu (1.360 ) no uma kain atus tolu tolu nulu resin lima ( 3.35 ) ne’ebe kompostu husi aldeia Risu, Railete, Fohoa, Lemanu no Sakoa.
Ekipa Kobertura : Lafaek News
Editor : Agapito de Deus
