Lafaek News—Autoridade Rejiaun Administrativa Espesiál Oé-cusse Ambeno (RAEOA), Kuarta 15/05/2024, hala’o lansamentu ofisial ba atividade kompetisaun kuda halai taru iha kampu Lifau, hodi komemora loron aniversáriu restaurasaun independénsia RDTL 20 de Maiu ba dala- XXII.
Prezidente Asosiasaun kurida Oé-cusse Mário Muni Salu hatete, Kompetisaun ne’e realiza durante semana ida, hahú husi ohin loron 15 to’o loron 19 hodi komemora loron aniversáriu restaurasaun independénsia RDTL ba dala XXII.
“Tanbá ne’e maka liu husi atividade ida ne’e ho objetivu haat maka hanesan, hodi komemora loron aniversáriu restaurasaun independénsia RDTL ba dala XXII, atu hamoris fali kultura kompetisaun kurida nian, no iha terseiru ami hanoin katak atividade ida ne’e sai hanesan desportu komunitária atu bele fo anima povu Oé-cusse nomós promove kulturál haki’ak kuda na’in sira,” dehan prezidente Asosiasaun Kurida Oé-cusse Mário Muni Salu.
Entretantu kampu ba kurida halai taru ne’e ninia luan 650 metru, signifika kampu ne’e ninia luan sufisiente ona ba estandar Internasionál, totál kuda ne’ebé maka partisipa hamutuk 40 maibé ida lá konsege rejistu, tan ne’e maka kuda 39 de’it maka sei kompete iha kompetisaun ne’e. Ho sexu kuda aman hamutuk 36 no kuda inan hamutuk 3.
Lansamentu kompetisaun Kuda halai taru ne’e hetan partisipasaun Koordenadór Comissão Executiva Zona Econômica Especiál Dezenvolvimento Oé-cusse Ambeno (CE-ZEEDOA) Dr. João Mendes Gonçalves hamutuk ho prezidente autoridade RAEOA Dr. Rogério Tiago de Fátima Lobato no Ministra Solidariedade Sosiál no Inkluzaun Sra. Verónica das Dores, Komandante PNTL RAEOA no komunidade sira.
Jornalista : Ekipa Lafaek
Editor : Agapito de Deus
