Lafaek News—Ministériu Juventude Desportu Arte no kultura (MJDAK) Liu husi Komisaun Regulador Arte Marsiais(KRAM) Kinta 16/05/24 entrega motorizada 12 no komputador 10 ba sub-KRAM 12 inklui RAEOA.
Objetivu husi ekipamentu informátika no motirizadas hirak ne’e atu fasilita funsionárius sub-KRAM sira halo atendimentu ba interese arte marsial sira iha munisípiu 12 ho Oe-kusse.
“Ohin Ministériu Juventude Desportu Arte no Kultura liu husi KRAM entrega Motorizada no komputadores sira ba funsionáriu KRAM nian no mós ba estrutura sub-KRAM sira iha munisípiu 12, atu asegura servisu KRAM nian iha nasionál no mós iha munisípiu sira hodi kontrola no fiskaliza, superviziona no monotoriza atividade organizasaun arte marsiais sira nian iha munisípiu hotu-hotu,” Prezidente KRAM, Octavio da Conceição ba jornalista sira iha edefisiu MJDAK.
Lider KRAM ne’e sublina, KRAM ninia servisu mak oinsá atu kontrola atividade treinamentu no organiza atividade kompetisaun inklui hala’o diálogu no desiminasaun lei no mós atividade sira ne’ebé mak relasaun ho Arte Marsial sira nia rezisténsia iha Timor-Leste, Organizasaun Arte Marsial iha FESTIL 16 no governu suspende Organizasaun sira ne’ebé mak hamahan-an iha silat Timor-Leste.
“Guverno suspende organizasaun hirak ne’ebé hamahan-an iha Federasaun Silat Timor-Leste ninia membru no organizasaun balun sempre komete iha problema ne’ebé perturba orden públika no des-ovidensia sira no orden legais sira ne’e mak guverno suspende hanesan orgnisaun PSHT IKS KORK sira nia atividade suspende too fulan Outubro tinan ne’e,” Octavio afirma.
Octavio haktuir tan, liu husi suspensaun atividade organizasaun arte-marsiais nian KRAM sei aprezenta relatóriu ba Ministru Juventude Desportu Arte no Kultura hodi aprezenta ba Konsellu Ministru atu bele hetan dezisaun foun oinsá bele reativa Arte-Marsiais, maibé atu loke hikas atividade arte-marsiais depende ba komportamentu membrus organizasaun arte-marsiais sira, treinador ho líder sira tuir segunda diretiva KRAM ne’ebé mak uluk produs no fahe ona iha tinan 2022.
Entretantu Motorizada no komputador ne’ebé KRAM entrega ba Sub-kram no funsionáriu hirak ne’e hetan husi kompania rua hanesan kompania ZEON INTERNATIONAL, UNIP LDA fornese ekipamentu informátiku ho orsamentu hamutuk $ 6455.00 gastus ba Laptop 12 no printer 1 no scanner1, Kompania young star Unip LDA sai hanesan manán nain ba motor hamutuk 12 totál Orsamentu $ 23.880.00 no totál orsamentu ne’ebé gasta ba ekipamentus informátika ho motorizada hamutuk $.30.335
Jornalista : Felix Fernandes
Editór : Agapito de Deus
