Lafaek News—Governu liu husi Ministériu Comérsiu Indústria (MCI), Nino Pereira, kinta (25/01/2024), vizita kompania Patricia Fresh Lounge Unip.lda hodi haree direta produsaun Xokolate, Sosis-Timor no Tua-Manas.
Ministru Comérsiu Indústria, Filipus Nino Pereira apresia kompañia Patricia Lounge Unip Lda ne’ebé eziste ho kreatividade halo produsaun nesesidade hirak hanesan xokolate, sosis no tua manas hodi kontribui ba dinámika ekonomia Timor Leste.
“Ita apresia ba inisiativa ba kriatividade produtividade ne’ebé Ita nia foin-sa’e sira no joven sira hatudu ona, ne’e mak dehan katak joven empregador sira iha kriatividade iha espíritu inovativu hakarak harii empreza ida hodi diversifika Ita nia ekonomia diversifika Ita nia produto agrikultura hanoin sira hanesan ne’e ha’u hanoin husi parte governu MCI hakarak promove Ita hakarak hakbiit tan dezenvolve sira hodi nune’e sira ninia intensaun oinsá produto ida ne’e bele tama iha merkadu,” Nino Pereira ba jornalista sira hafoin vizita kompania Patricia Unip Lda.
Nino dehan, nudar mós konsumidor enkoraza nafatin espíritu joven sira nian atu diversifika produtu lokál, tanba governu sei fasilita emprezas sira iha parte finanseiru.
“Ha’u rasik hanesan konsumidor Ida ba sosa sira produto ida ne’e iha super merkadu Neimart, ami haree iha mós produtu Xokolate iha mos produto sira seluk, tan ne’e liu husi vizita ne’e enkoraza Ita nia joven sira kontribui ba dezenvolvimentu ekonomia iha ita nia nasaun tenke hamriik ho dignidade ida katak Ita iha produtu potensial lubuk ida presiza diversifika Ita nia produtu hanesan kakau, batar produz fali ba tua sai hanesan materia prima iha mos fahi sai fali sosis ka surisu fahi, ida ne’e ita haree orgániku tebe-tebes diak ba saude duke Ita han produtu importasaun kontaminadu ho kímiku prejudika mos ba Ita nia saúde,” Nino salienta.
Nia dehan, Ministéiru Comérsiu Indústria hakarak apoia saida mak sira halo tiha ona, MCI iha orsamentu ne’ebé hanesan fasilidade garante do kréditu iha millaun 50 iha banku BNCTL, ita sei haree atu fasilita hanesan oin ita temi kapasidade finanseiru ba empressas sira assesu ba ida ne’e,” nia afirma.
Iha sorin seluk, kompania nain Patricia Madalena Mendes senti kontente ho vizita husi Ministéiru Comérsiu Indústria Nino Pereira, ne’ebé bele vizita ona kompania Patricia Fresh Lounge Unip lda
“Ha’u agradese Ministru Comérsiu Indústria bele mai ha’u nia fatin liu husi ne’e bele sai marketing maka’as atu haree, tanba Ministru rasik gosta atu han ha’u nia produtu lokál, iha produsaun hanesan Xokolate ne’e produsaun husi kakau mix ho parte sira seluk hanesan fore rai, vanila, agora dadaun ha’u sosa husi CCT ba futuru ha’u planu atu halo rasik sosa husi Same, kilo ida dolar 3.50 sen, Produsaun ne’e seidauk haruka ba nasaun rai-liur ne’e planu ba tinan oin dala ruma bele, material sira ne’ebé durante uza ne’e sufisiente no la’o di’ak, kada loron bele halo kilo 8, ami iha produsaun seluk hanesan tua Timor nian hanesan POT kamics ou tua- manas hanesan boot ka ramkacaca sira hanesan ne’e no iha Sosis timor,”dehan Patricia.
Jornalista : Arnaldo Nunes
Editór : Agapito de Deus
