Lafaek News—Prezidente Repúblika, José Ramos-Horta, informa konfirmadu iha tinan 2024 ne’e Papa Francisco sei vizita povu Timor Leste
Horta hatoo asuntu ne’e liu husi komunikadu imprensa ne’ebé lafaek news asesu iha loron tersa (23/01/2024), hafoin Xefe Estadu Timor Leste hala’o enkontru dahuluk ho Santu Papa Francisco iha Basílica Santa Marta, sidade Vatikanu nian.
“Amu Papa kontente ho Timor-Leste. Nia hadomi no akompaña situasaun no konfirma hakarak vizita Timor-Leste,” Prezidente Ramos-Horta iha komunikadu ne’ebé Lafaek News asesu iha loron tersa (23/01/2024).
Nia dehan kona-bá vizita ne’e, markasaun data sei anúnsia ofisialmente hosi Igreja katólika TL hamutuk ho Santa Sé, maibé depende ba delegasaun hosi Vatikanu ne’ebé iha fulan rohan Janeiru ne’e, sei to’o iha Díli hodi estuda mekanízmu sira liu-liu estuda lojístika no infra-estutura ba vizita Sua Santidade nian.
Iha enkontru lider nain rua ko’alia kona-bá vizita RDTL, no diskute mós kona-bá situasaun mundiál inklui situasaun Myanmar, Solusaun ba situasaun sira hotu, iha diskusaun ne’e mak halo mediasaun liuhosi negosiasaun atu labele hamosu tan guerra sivíl ida ne’ebé pior, hanesan mós iha Gaza no Ukránia.
“Haklean análiza situasaun ba Amu Papa ne’ebé preokupadu tebes liga ho umanitária no militár ne’ebé la konsege manan funu ne’e,” afirma Ramos-Horta.
Iha enkontru ne’e lider boot nain Ko’alia mós kestaun dívida mundiál ba nasaun sub-dezenvolvidu sira inklui problema kiak iha mundu.
“Amu Papa apresia mós kona-ba relasaun entre Igreja ho Estadu ne’ebé la’o ho independente no la interfere malu, maibé kolabora institusionalmente nu’udár Timor-oan. Hanesan Xefe Estadu sempre orgullu lori Timor ba mundu maske rai ne’e ki’ik maibé mundu koñese no nasaun barak konsidera,” dehan Horta.
Prezidente Horta haklean, Amu Papa sempre akompaña aten-brani povu Timor nia luta ba independénsia, hatene mós sakrífisiu sira hotu inklui admirasaun ba Timor-Leste nia rekonsilisaun ho Indonézia ne’ebé lais liu tambá konsidera hanesan rekonsilisaun úniku iha mundu maske iha funu-naruk nia laran.
Nune’e, Xefe Estadu esplika katak rekonsiliasaun ne’ebé akontese tanbá lideransa Kay Rala Xanana Gusmão ne’ebé dada ba luta no dada ba rekonsilisaun.
molok hakotu, Prezidente Republika husu ba povu tomak atu “reza ba Amu Papa nia saúde”, nune’e bele vizita Timor-Leste iha fulan-klaran tinan ne’e nian.
Remata enkontru ho Papa Francisco, Prezidente Horta ho delegasaun kontinua enkontru ho Primeiru-Ministru Vaticano, Cardeál Pietro Parolin no Seretáriu Estadu Assuntu Relasaun Internasionál Vaticano, Archebispo Paul Richard Gallagher, hodi hakle’an diskusaun ba planu vizita Amu Papa nian iha tinan ne’e.
Iha vizita offisiál ne’e, Xefe Estadu akompaña hosi, Ministru Negósiu Estranjeiru, Bendito Freitas, Embaixadora Timor-Leste ba Santa Sé, Cheloé Tilman Dindo, Xefe Casa Civíl Prezidénsia Repúblika, Jesuína Maria Ferreira Gomes, Assesór Relasaun Internasionál Prezidénsia Repúblika, Nelson dos Santos no sira seluk tan.
Jornalista : Epifania I. Pinto
Editór : Agapito de Deus
