Lafaek News–(AILEU 4/12/2023). Ekipa Tékniku husi Ajénsia Tic Timor serbisu hamutuk ho Diresaun Nasionál infra-estrutura no komuníkasaun (DNIK), halo manutensaun ba Fíu Fibra optíka ne’ebé hetan estragus hosi ai-tohár iha fulan fevreiru 2023.
Enkuantu, koperasaun entre parte rua pozitivu tebes, fi’ar katak, sei normaliza hika’as funsionamentu koneksaun interneta, hodi bele fasilita no hafasíl serbisu administrasaun Munisípiu, nune’e bele asesu ba sentru dadus governu nian ne’ebé estabelese iha Palásiu do Governu.
“Objetivu prinsipál husi Atividade ne’ebé hala’o husi ekipa tékniku ajénsia Tic Timor no Diresaun Nasionál infra-estrutura no Komunikasaun mak kona-ba halo manutensaun kabu ou fíu fíbra optíka ne’ebé interliga ho Munisípiu Dili, Munisípiu Aileu nomós Munisípiu Ermera, fíu ou kábu fíbra optíka refere ne’e hetan estagus ai tohar hanehan iha fulan Fevereiru 2023 tamba ne’e ohin ekipa Tekniku sira husi DNIk Ajensia Tic Timor halo manutensaun atu bele normaliza fila fusionamentu koneksaun internet no intranet,” informa Jestór Ajénsia Tic Timor Henrique Fulcengio Guterres, ba Lafaek News iha Munisípiu Aileu, segunda 4/12/2023.
Jestór Tic Timor ne’e konsidera fíu fíbra optíka ne’e importante tebes no presija fó atensaun sériu, tamba bele halo konektividade ba transfére dadus interneta ne’ebé ligadu ho servisu administrasaun sira iha Munisípiu hodi asesu ba sentru dadus governu nian.
Entretantu, servisu ne’ebé hala’o husi ekipa DNIK ho téknika Ajénsia Tic Timor iha faze primeira mak hahú husi dirasaun Dili-Aileu ho metru ri-hun rua (2000) no seihala’o durante loron lima tamba ho distánsia ne’ebé do’ok.
Tuir Observasaun jornalista Lafaek News iha Trénu nota katak, ekipa tékniku husi DNIK no Ajénsia Tic Timor serbisu maka’as lo’os, hodi dada fíu fíbra optíka, Diresaun Dili-Aileu, maske kondisaun udan maibé ekipa tékniku sira nafatin serbisu hodi Dada fíu hahú husi Dili no sei hotu iha Aileu.
Jornalista : Mateus F.de Deus
Editor : Marcos da Silva Araujo
