Lafaek News–Kompañia telekomunikasaun SAKOM Timor-Leste ka Grupu SAKOM-TL, lansa ona kabu fibra ótika ne’ebé dada husi Indonézia mai Batugade Timor Leste (TL), hodi garante kualidade fornesimentu internet ba kliénte sira iha Timor-Leste.
Na’in ba kompañia SAKOM-TL, Abílio Araújo hateten, tinan rua nolu resin ona, kliénte telekomunikasaun barak sempre preokupa kona-bá kapasidade liña internet, tanba la’o ho velosidade kleur liu.
“Iha tinan hira nia laran to’o oras ne’e, ita iha problema barak kona-bá internet, dala barak ita hare’e iha mídia sosiál dehan internet lenuk, atu download tiha ita ba mai pasiar to’o tiha Díli, fila-fali mós download seidauk hotu. Ohin loron la’e, ho ligasaun kabu fibra ótika husi Timor ba rai liur lalais,” haktuir Na’in ba kompañia SAKOM-TL, iha Palásiu Prezidensiál Aitarak-Laran Dili, (20/11/2023).
Nia esplika, dala barak download video hirak ne’ebé ho megabyte ha’at ka lima lori tempu besik oras ida, maibé lansamentu Trial ba Cross-Border Fibra Ótika iha Batugade, bele garante kualidade internet ho lais liu.
“Ho akontesimentu ida ohin ne’e ha’u bolu akontesimentu istóriku, ne’e primera vez iha tinan hira nia laran kompañia privadu timor-oan nian naran SAKOM-TL mak halo e realiza asaun ida ne’e. Tanba ne’e mak ohin ha’u mai, primeiru onra bo’ot ida atu halo lansamentu ida ne’e halo iha Palásiu Prezidensiál, e segundu enkoraza investidór nasionál Timor-oan ke hanoin katak, ita-nia rai ne’e presiza duni tama iha era dijitalizasaun,” dehan Abilio Araújo.
Kabu fibra ótika ne’e, kompañia SAKOM-TL dada husi Indonézia, tanba servisu hamutuk ho kompañia PT Indonézia PLN Icon Plus, tanba kompañia ne’e kabu fibra ótika iha Indonézia hamutuk kilómetru rihun 275.000.
“Parseria ida ne’e la’os servisu hamutuk de’it, maibé ita uza sira nia cable husi Indonézia ba to’o rai liur, maibé iha laran ne’e buat hotu-hotu iha rai-laran ita mak na’in ba infra-estrutura tomak, ne’ebe iha ne’e sein pursentu ita-nian,” tenik nia.
Enkuantu ida ne’e hanesan faze try out, SAKOM-TL kria nia baze iha Batugade ho naran SAKOM-TL Batugade International Getaway, iha ne’ebá mak Timor Leste sei simu ligasaun kabu fibra ótik husi Indonézia mai Batugade.
SAKOM-TL tau nia demarkasaun point iha área uma-ne’en parténse ba iha Atambua, iha ne’eba routers mós SAKOM-TL nian, inklui router Batugade. Nune’e, iha Batugade mak fahe ba operadór hirak hanesan Timor-Telekom, Telkomcel no ISP hirak seluk ne’ebé mak hakarak foti internet husi SAKOM-TL.
Investimentu faze dahuluk ne’e mai to’o Batugade, maibé SAKOMP-TL espera investimentu faze daruak tuir mai iha tinan oin, kabu fibra ótika sei dada to’o Díli, tanba SAKOM-TL hand over iha Díli, entaun bele lansa hodi supply ona ba uma, departamentu, no ne’ebé de’it, no sei loke mós data center.
Nia hateten, kompañia telekomunikasaun Timor-Telekom mak halo tiha ona akordu hodi dada kabu fibra ótika husi SACOM-TL. Kompañia telekomunikasaun hirak seluk sei iha hela faze negosiasaun hodi halo try out.
Enkuantu tuir nia, Prezidente Repúblika José Ramos-Horta mós apresia investimentu ne’ebé grupu SACOM-TL hala’o iha setór telekomunikasaun nian, tanba ida ne’e hanesan kontribuisaun husi setór privadu ba prosesu dezenvolvimentu Timor-Leste nian.\
Estajiada : Epifania I. Pinto
Editor : Agapito de Deus
