Lafaek News—Sekretariu Estadu Komunikasaun Sosiál (SEKOMS), Expedito Dias Ximenes husu media nasional liu-liu media dijitál online sira atu produs notisia ne’ebé iha kualidade no kredibilidade hodi minimiza informasaun hoax iha Timor Leste.
Expedito Dias hatoo asuntu ne’e iha ámbitu asina kontratu ho media online hamutuk 14 iha palasiu governu, kinta (05/10/2023), hodi servisu hamutuk lori informasaun husi nasional ba baze no husi baze ba nasional.
Iha okaziaun ne’e, SEKOMS ne’e esplika, asina akordu ne’e hatudu katak governu konsidera media importante ba demokrasia, media importante ba prosesu konstrusaun estadu, no media pilar importante ba prosesu dezenvolvimentu nasionál, tanba ne’e iha servisu hamutuk ida ne’e asina akordu ida ne’e la signifika, governu atu intromete produtu jornalísitku nian ida lae governu sei la halo intervensaun ba iha produtu jornalísitku ne’ebé ba da-daun Jornalista sira hala’o.
“Hanesan ema ne’ebé tau matan ba iha area komunikasaun hakarak informa katak ita bele hakarak lais, maibé keta haluha kualidade informasaun tanba oras da-daun públiku kestiona hela kona-ba kualidade informasaun, tanba ne’e ita persiza fo resposta kualidade ho ita nia produtu jornalísitku ne’ebé ho kualidade, governu liu husi SEKOMS mos sei tau atensaun ba iha formasaun no kapasitasaun ba Jornalista sira, hodi bele tulun jornalista sira nia difikuldade, ohin governu liu husi SEKOMS hato’o oitoan ba iha jornalista dijitál online sira ita servisu hamutuk ida ne’e hahu ohin ba ohin orsamentu oitoan ne’ebe governu tau ba iha SEKOMS atu ajuda media sira, tanba governu sente media importante, maibe jornalista sira iha liberdade ba kobertura, maibé keta haluha responsabilidade ba povu no nasaun Expedito Dias Ximenes hakotu lia.
Jornalista :Mateus F. de Deus
Editór : Agapito de Deus
