Lafaek News—Reprezentante populasaun postu Nitibe munisípiu Oe-cusse, David Mnac espresa nia parte apresia ONG Permacultura Timor Leste (PERMATIL) ne’ebé ho estratéjika kuda bee-matan, liu husi hadia debu natural, kee debu foun, travasaun kadalak, konserva agrikultura rai lolon no halibur mikro-organizmu sai adubus ba fertalizasaun rai.
Akampamentu durante semana ida kompostu husi loron 5 iha aldeia Lakufuan, suku Kosta postu Pante-Makasar munisípiu Oe-Cusse, partisipantes sira harame laletek aas foho Leolbatan ne’ebe administrasaun iha povosaun Lakufuan ho temátika 3 hanesan konservasaun bee, Sloping Agriculture Land Technology (SALT) ou tékniku agrikultura rai lolon, konservasaun agrikultura no konservasaun bee.
“Ha’u senti kontente tebes tanba bele partisipa iha atividade Permatil nian ne’e, tamba liu husi programa permatil nian ne’e ha’u aprende matéria lubuk kona-ba oinsá atu halo konservasaun bee no halo travasaun bee, ha’u hakarak tebes tuir programa ne’e tanba iha ami nia suku agora bee menus, tebes tanba ne’e ha’u partisipa iha programa ne’e atu ne’e liu husi matéria ne’ebé ha’u aprende ona ha’u bele fila implementa fali iha ha’u nia suku ou aldeia atu bele hamoris fali bee matan sira atu nune’e bele fo moris ba ema no mos Balada sira,” partisipante Permatil David Mnac ba lafaek news iha foho as Lakuafuan foin lalais.
Partisipantes sira ne’ebé halibur an iha akampamentu ho naran Perma Youth Camp 2023 Oe-Cusse, halibur formandus hamutuk 380 mai husi postu Pante-Makasar, Nitibe, Oe-silo no Pasabe, inklui munisípiu Likisá, Ermera, Vikeke.
Iha atividade ne’e partisipante David Mnac senti kontente tebes, tanba bele partisipa iha atividade Permatil nian ne’ebé hala’o iha sira nia Munisípiu rasik hamosu rezultadu diak hanesan bee matan hirak ne’ebé maran tinan naruk moris fila fali, no aumenta bee-matan ne’ebé kiik sai boot fila-fali fornese ba komunidade sira ho sustentabilidade.
“Ha’u agradese tebes ba Permatil ne’ebá ho fuan boot mai realiza programa ne’e iha ami nia munisípiu tamba liu husi programa permatil nian ne’e ami aprende buat no hetan esperiénsia husi programa permatil nian dala ida tan agradese tebes ba Ngo permatil ,” David sublina.
Akampamentu juventude permaculture Timor Loro sa’e (perma-youth Camp 2023) Oé-Cusse tinan ne’e, Permatil hetan tulun Ministériu Juventude Desportu Arte no Cultura (MJDAC), RAEOA/ZEEMS, AFD, CCFD, UNESCO no no Kooperasaun Franca, eventu ne’e hetan transmisaun direta hosi media Lafaeknews.tv no ekipa konsumsi husi Dilicios-Dili.
Jornalista : Mateus F. de Deus
Editor : Agapito de Deus
