Lafaek News—Komunidade aldeia Lugululi suku Manapa postu administrativu Kailako, munisípiu Bobonaro, lamentavel ho kondisaun estrada sai kestaun problemátiku hodi fasilita agrikultor lori produtu lokál asesu ba merkadu munisípal.
Kestaun ne’e hatoo husi delegadu suku Manapa Albano Soro Ato ba lafaek news iha aldeia Lugululi katak nia parte sente triste tebes bainhira haree estrada ne’ebé mak ho nia kondisaun ladun favorável ba kumunidade aldeia Lugululi perante ukun an tinan 20 nia laran.
“Ha’u nu’udar delegadu suku ha’u sente triste tebes wainhira tempu udan ha’u hare ha’u nia komunidade aldeia lugululi la lori sira nia produtu lokal ba merkadu, tan deit estrada la favoravel ba komunidade sira.”Dehan Albano soro-Ato ba jornalista lafaek news iha nia fatin lugululi, Kailako, foin lalais ne’e.
Nia dehan, durante tinan barak ona aldeia Lugululi sofre ba kondisaun estrada ne’ebé mak ladun diak ba komunidade sira nia moris, tempu bailoron komunidade sira sente kontente tebes, bainhira udan sira sente teriste tebes, tanba sira labele lori sira nia produtu lokal ba merkadu.
“Ha’u hanesan delegadu suku nia ha’u sente triste tebes wainhira hau hare ha’u nia komunidade sira, tempu udan sira la bele lori sira nia produtu lokal ba merkadu tan deit estrada la seguru ba sira ha’u husu ba governo sira bele tau matan ba ami povu ki’ik sira ne’e,” nia hakotu.
Dezenvolvimentu lolos tenke komesa loke husi baze mak ba nasional, labele husi nasional ba baze, estadu lolos mak povu kiik ne’ebé hela iha areas remotas, kiak hela bee mós no kiak ba infrestrutura.
Tanba ne’e, husu governu atu prioridade ba infraestrutura báziku iha baze nune’e bele responde direta ba nesesidade povu iha areas remotas atu nune’e povu bele sente direta no goza nabilan husi ukun rasik an ida ne’e.
Reportajen: Adolfina Soares
Editor : Agapito de Deus
