Lafaek News—Negosiante tais lokál Kolmera, João Gonçalves, sente triste tanba laiha rendimentu kada loron hasusar tebes ezijénsia moris atu hatan ba nesesidade uma laran no selu oan sira eskola.
João hatoo asuntu ne’e ba lafaek news iha merkadu tais tradisional Komlera, kuarta (31/08/2022), katak prezensa komprador iha merkadu tais ne’e la hanesan uluk kompara ho situasaun ohin loron, ema la sosa hanesan uluk.
“Loron-loron ha’u fa’an tais tradisional la hetan rendimentu ne’ebé mak sufisiente mai ha’u, maibé ha’u nafatin fa’an hodi nune’e hetan osan sustenta ha’u nia famila no selu ha’u nia oan sira nia eskola oan importante loos ba moris, no halo uma hodi hela”, hatete negosiante Tais tradisional Kolmera João Gonçalves.
Negosiante tais ne’e haktuir, maski rendimentu la dun di’ak, maibé pasiénsia nafatin tur hein komprador sira husi dadeer too kalan, sekarik hetan osan uituan bele sustenta moris loron-loron no selu oan sira ba eskola, Tais ne’ebé agora da-daun fa’an ne’e ho folin $15.00 karik fan tutan ho folin $ 25.00, hetan fundus $10.
“Tais ne’ebé ha’u fa’an ne’e soru rasik no tais balun sosa tutan iha munisípiu sira seluk dalaruma tais ne’ebe sosa tutan ne’e nia kualidade la dun di’ak kompara ho tais sira soru rasik,” katak nia.
Entretantu negosiante tais Kolmera João Gonçalves orijenalidade husi Ermera, postu Atsabe suku Atara aldeia Adubere, no lori rendimentu husi tais sustenta ona oan ida halo estudu too ona iha nivel universitaria no nain lima seluk sei estudu hela iha pre-sekundaria no ensinu sekundaria.
Estajiada: Adolfina Soares
Editora : Rita Moniz
