Husi: Moisés Vicente

Dezastre naturais ne’ebé akontese iha parte Kosta Sul hetan inundasaun makas ne’ebé akontese iha loron 29 to’o 30 fulan Juñu 2022 iha Munisipiu sira parte Kosta Sul nia, hetan estragus uma kain hamutuk 1.361 iha ne’ebé akontese iha Munisipiu Lautem, Viqueque, Manufahi, Manatutu, Ainaro no Covalima afeta dezastre naturais, tanba sira nia hela fatin hetan estraga husi inundasaun. Munisipiu Covalima rejista uma kain 250 hetan desastre inundasaun ka be’e sa’e iha Postu Suai Villa, Maukatar no Tilomar.

Iha Munisipiu Viqueque hamutuk uma kain 554 no afeta ba ema nain 1,656 ne’ebé akontese iha Viqueque Villa, Uato-Lari no Uato-Karbau. “Manufahi 206, afetadu 1,014. Ainaro 3 maka afetadu, Baucau 11, Manatuto akontese iha Barique ho total familia 327 ho nia ema hamutuk 1,566. No iha Manusipiu Lautem/Lospalos hetan 2 maka hetan afetadu.

Iha parte seluk, liga ba inundasaun iha parte Kosta Sul nia no iha tinan hirak liubá mos akontese inundasaun bo’ot ida ne’ebé akontese iha loron 3-4 fulan Abril tinan 2021 liubá, kuaje mota lolon sia maka loke aan no sobu rai iha Dili, hodi rezulta hoban uma lubuk ida iha Dili laran no hamate mos ema lubuk ida, hamate mos membru Polísia Nasional Timor-Leste (PNTL) ida husi Batalliaun Ordem Pública (BOP) ne’ebé mota lori husi mota Maloa ba hetan fali iha Ai-Tarak Laran. Rezulta povu sira husi Ambeno kuaje nain 3 mate iha area mota Beduku, Comoro. Inundasaun ne’e mos sobu rahun estrada públiku balun hanesan estrada ida iha area Prai dos Coqueiros besik embaixada Japaun nia oin kotu total. 

Ita hare realidade sira ne’e, maibé mundu ohin loron mudansa klimatika iha ita nia nasaun Timor-Leste, mudansa klimatika ida ne’ebé lao tuir nia tempu no lao tuir mudansa mundu globalizasaun nian. Timor-Leste laos foin hetan indundasaun hanesan ne’e, maibé bebeik ona hetan inundasaun bo’ot iha kapital Dili iha ne’ebé sempre akontese bebeik.

Tinan 2013 liubá ne’e, Fundasaun Mahein (FM) hakerek ona relatóriu kona-bá ameasa ohin loron no ba jerasaun foun hare husi prespetiva ambiental implika ba siguransa nasional. Kazu Timor-Leste nu’udar ezemplu konkretu ida katak siguransa ambiental sai mos dezafiu ida ba dezenvovlimentu nasaun iha futuru. Iha ne’ebé tinan 2009 liubá, Prezidente Repúblika (PR), Dr. José Manuel Ramos Horta aprezenta mos Timor-Leste ba ona iha United Nations High-Level Event kona-bá mudansa klimatika iha Nova Yorke, argumenta katak pubreza maka sai kauza primaria ba degradasaun ambiental iha Timor-Leste, no sai mos kontributor maior ba vulnerabilidade mudansa klimatika nian. Realidade ba degradasaun ambiental iha Timor-Leste husi fator oin-oin. Hanesan atetude komunidade ne’ebé la konserva ambiente.

Iha lidun seluk, ita Timor-oan balu hahalok tesi ai no sunu rai arbiru, soe lixu arbiru no agrikultor subsistensia nu’udar aktu ida ne’ebé fó ameasa bo’ot ba siguransa ambiente iha ita nia nasaun rasik. Maibé wainhira la iha atensaun ba ambiente iha Timor-Leste bele hamosu impaktu sira hanesan inundasaun iha tempu udan, bee-maran iha bailoron naruk, komunidade sira lakon rai agrikultura ne’ebé produtivu, seguransa ai-han la seguru no seluk tan. 

Wainhira ita hetan krize ba ai-han afeita ona individual maka sei habelar sai hanesan ameasa seguransa iha seitor ekonomia mos no ba saúde komunidade nian no ikus maka haboot hodi sai fó risku ba ameasa seguransa komunidade nian. Iha ne’e Hakerek Nain nia observasaun katak iha problema bo’ot liu maka ema barak halo konstrusaun sein lao tuir regras, no la halo kontrola kualidade halo uma, drenajen sira la halo diak no ida ne’e maka bele hetan vulnerabilidade ba inundasaun. Iha ne’e Hakerek Nain hakarak husu ba Governu oinsa maka halo lei regulamentu ruma kona-ba konstrusaun sivil no oinsa maka harii uma nian ho lolos, lao tuir dezeñu ema Arsitektura nian?.

Ita hare, lixu fatin sira no sistema koleksaun lixu la sufisiente. Lixu fatin mos la kontrola ho diak, lixu sempre fakar iha dalan, no labarik no animal sira bele tama fasil. Ema servisu ba koleksaun lixu mos enfrenta risku lor-loron tanba Estadu la fornese ekipamentu protesaun pesoal ne’ebé adekuadu. Ida fali mos maka Governu seidauk halo kampanha hodi sosializa no hanorin importansia jestaun foer ba komunidade sira, liu-liu liga ho protesaun kontra dezastre naturais no moras oi-oin. Ida nee kontribui ba mentalidade iha komunidade barak maka soe lixu arbiru no la hanoin kona-bá konsekuensia wainhira lixu halo drenajen la lao. Konsekuensia husi falta regras konstrusaun maka komunidade barak halo uma iha mota ninin sira, tasi ibun sira. Kapital Dili besik foho ninin sira ita hare komunidade hola rai, depois halo uma iha foho lolon nian ne’e mos barak los.

Iha ne’e hatudu katak se jestaun urbana la diak, maka hamosu mos kontribuisaun ba indundasaun. Wainhira udan bo’ot tun, kapital Dili sai hetok at liu tan, tanba jestaun halo uma ladiak. Ita halo komparasaun ho nasaun seluk, halo jestaun urbana halo diak duni, fó dalan ba kanu bee foer soe fatin diak. Oinsa maka bele minimiza nia impaktu husu ba komunidade sira hotu katak, atu hadok an husi kona-bá inundasaun iha udan bo’ot. Ne’e maka, presiza regras ne’ebé asegura katak komunidade tenke halo uma dok husi mota ibun, tasi ibun labele halo uma iha foho lolon, no uma sira tenke halo tuir standar minimum.

Presiza asaun boot husi Governu rasik atu hadiak drenajen no mota dalan iha sidade laran tomak, inklui haree ba jestaun lixu ne’ebé sempre fó impaktu ba drenajen sira ne’e.

Ikus liu, taka maka halo rekomendasaun ba Governu Timor-Leste falta halo jestaun urbanu no infraestrutura fisika iha kapital Dili, no mos iha area urbana iha Munisipiu sira seluk maka bele kontinua hetan nafatin hetan inundasaun. Husu ba Governu atu aprova no implementa lei regula konstrusaun hari uma nian, kria planu ba hadiak drenajen iha Dili laran.

Atu husu mos ba Ministeriu Administrasaun Estatal ne’ebé fó sai iha media nasional sira katak atu hari uma rihun lima. No bainhira maka atu Ministeriu Administrasaun Estatal atual Ministro da Administração Estatal, Miguel Pereira de Carvalho atu implementa ona planu hari uma rihun lima iha bairo foun ne’ebé identifikadu ona iha parte area Hera nian no parte ba Tibar nian ba vitima dezastre naturais, iha Munisipiu Dili.

*Hakerek Na’in: Alumni Universidade da Paz-(UNPAZ), Faculdade de Direito no Institutu Superior Cristal-Departemento Sociologia no Ativista. Artigo ida ne’e larepresenta institusaun ne’ebé hakerek na’in haknar ba, maibé idea no argumentu sira ne’ebé lekar iha artigu ne’e nudar opinião pesoál. Iha sujestaun ruma bele haruka iha telefone +67077291406 ou e-mail: moisesvicente59@yahoo.com