Lafaek News-(Venilale)-Idoza Carlota Virgina Guterres, husu kandidatu prezidente repúblika ne’ebé eleitu tenke hadomi Povu hapara konflitu no hanesan aman ba nasaun labele tuur de’it iha fatin, presiza la’o hodi haree rasik povu nia sofrementu iha tempu dezastre naturais
Ha’u husu ba prezidente foun ami povu ami lakohi terus tan labele halai tan ami hakarak hakmatek hela de’it iha fatin,” Carlota ba jornalista sira hafoin vota iha sentru Suku Uatu-haco, postu administrativu Venilale, sábadu (19/03/22).
Idoza Carlota hatete, kandidatus 16 ne’e se mak simu poder husi povu, labele tur de’it iha fatin kuando povu infrenta problema dezastre hanesan rai-monu tenke besik ba povu atu haree rasik.
Idoza ne’e mos esplika katak ohin nia mai vota haree kondisaun estrada la di’ak, nune’e sira tenke la’o husi mota laran hakur liu husi foho leten kuaze kilu-metru 5 hafoin too iha sentru votasaun hodi ezerse nia direitu votasaun.
Total Populasaun iha suku Uatu-hoco hamutuk 3797, ne’e kompostu husi aldea haat Uato -asa, Uaitalibu, Liabala, Oso-Gori ho total votantes 1099.
Iha sorin seluk,, Administrador Postu Admistrasaun Venilale munisípiu Baukau, Miguel Mendes Mans Guterres, reafirma nia povu fo ona votus hodi hili prezidente repúblika foun, husu rezidente foun ko’alia ho governu atu dezenvolve edukasaun no be mos ba povu Venilale.
Miguel ne’e afirma, postu administrativu Venilale iha problema sériu liu ba edukasaun, husu prezidente eleitu foun kari mai ko’alia ho governu hadia edukasaun, tanba edukasaun importante iha nasaun ida atu eduka povu hili ema matenek iha kada eleisaun no liu husi edukasaun mak bele dezenvolve Venilale.
Problema seluk mak be mos no agrikultura tanba baibain dehan povu kuda governu sosa, maibé la implementa no problema ne’ebé afeita liu mak be mos, tanba komunidade dada be husi postu Osu mai Venilale, maibé bailoron ema halo kuak, entaun susar, no problema seluk mak povu hela iha okos be matan kraik, dehan admistrador Venilale Miguel ba Lafaek News, iha Venilale.
Jornalista : Acacio Pinto
Editor : Agapito de Deus
