Lafaek News-(Bobonaru)-Kinta (10/03/2022), kampania dala-9 kandidatu prezidente repúblika númeru 14, populasaun munisípiu Bobonaru sai hotu ba Malianan book an la di’ak hakat mós la di’ak, rihun ba rihun antuziasmu simu Premiadu Nobel ba Paz José Ramos Horta.
Militantes ho apoiantes sira husi Maliana villa munisípiu Bobonaru halo komboiu nadodon ho motorizadas ho kareta haklalak kesi atributu partidu CNRT nadodon ulun iha Vila ikun iha ponte Nonura, haklalak tutuir dalan too iha kampu Gor Maliana hodi hein no simu kandidatu Prezidente Repúblika José Ramos Horta ho dadolin lian terik Maliana hodi fo hatais ho tais Bobonaru nian.
Eletores sira ne’ebé simu kandidatu prepzidente repúblika ho númeru sorteiru 14 ne’e mai husi postu administrativu Atabae, Balibo, Kailaku, Lolotoe, Bobonaru ho Maliana vila halibur populasaun rihun ba rihun konsentra iha Maliana vila hodi simu lider nasional nai rua Ramos Horta ho Xanana Gusmão.
Animasaun hodi simu lider nasional rua ne’e hatudu dansa kultura, poeta ho titulu ohin lakon esperansa, tebes dae, dadolin husi lian nain ferik katuas sira haklalak ho mata-wen loke liman simu Horta ho Xanana. https://lafaeknews.tl/populasaun-suai-hamamuk-uma-hobur-ramos-horta/
Poeta ne’ebé Maliana oan feto ida hatoo soke joven, ferik ho katuas balun mata-wen monu bainhira hateke ba jestu lider karizmátiku Kay Rala Xanana Gusmão hatudu ba povu Bobonaru ne’e, balun hamnasa haklalak, maibé balun mate-wen monu neineik, foti tixu hamoos sub-subar iha maluk seluk nia leet.
Baptista Magalhães mai husi postu Administrativu Kailaku, hateten uluk foin sa’e hanesan joven iha tempu rezisténsia sempre rona naran José Ramos Horta liu husi Radio ko’alia kona-ba asuntu Timor nian iha rai liur, iha ailaran sempre rona mós ema ida naran Xanana, too ohin loron sira nain rua sei iha nafatin, sira nain rua de’it mak bele koñese povu Timor nia situasaun moris.
‘’Uluk ha’u sei idade tinan 9, ha’u sempre rona naran ida Ramos Horta ho Xanana ho amu Bispu Belo, laiha tan seluk, Ramos Horta sempre ko’alia husi RTP, dala ruma ha’u, ha’u rona husi Radiu Nederland, iha ailaran Xanana de’it, ami Maliana ne’e afilia hotu kedan ba CNRT hodi hili Horta ba Prezidente Repúblika,’’ katak Baptista Magalhães.
Nia dehan, populasaun Bobonaru seidauk mai hotu, se mai hotu Maliana book an mos la di’ak, tanba ema barak mak hein kandidatu PR José Ramos Horta ho Xanana Gusmão, eleisaun iha loron 19 ema hotu sei ba tuu iha loron 14 lori Ramos Horta ba Prezidente Repúblika periodu 2022-2017.
Entretantu, Kandidatu Prezidente Repúblika númeru sorteiru 14, Premiadu ba Paz José Ramos Horta, sente haksolok espresa sentimentu ksolok no hatoo agradese wain ba povu Bobonaru ne’ebé haksolok simu sira nain rua (Horta Xanana).
Hakuak boot ba imi hotu simu ami rua maun boot Xanana, Bobonaru hamutuk ho Kovalima no Oe-kusse, munisipiu hirak ne’e ba futuru sai poténsia ba dezenvolvimentu, bainhira krize 75 imi mak simu uluk funu, ha’u hakat too Balibo too Bobonaru ho jornalista ida, ami hahu ho bobnaru mai too Batugade, hau lori jornalista nain lima 5 ba Balibo toba iha rai, Balibo hateke ba tasi haree ona Indonézia,’’ katak kandidatu númeru 14 ne’e.
Observasaun lafaek news iha komisiu polítika hahú diskursu dahuluk hosi kandidatu PR José Ramos Horta, partisipa iha eventu polítika ne’e CNE, STAE, observador nasional ho internasional, hetan seguransa másimu husi komandu PNTL munisípiu Bobonaru, inklui partidus polítikus kompostu husi Frente-Mudanca, PATIFOR, CNRT, ASDT, PDC, PSD ho PST, kampania ba dala-10 sei hala’o iha munisípiu Ermera iha loron sesta 10/03/2022.
Jornalista : Abekha Raihusar
Editor : Agapito de Deus
