Lafaek News (Manufahi)-Kandidatura númeru sorteiu 1, Isabel da Costa Ferreira iha nia komisiu polítika promete bainhira hetan konfiansa husi povu sei tau iha nia kabaas hodi prioritiza lori povu sai husi ki’ak no mukit.
Ha’u promete se mak la’o ho ha’u, nia konfiansa ne’ebé fó mai ha’u la monu ba rai ha’u tau iha ha’u nia kabaas atu tau matan ba sira hodi lori sira sai husi terus no ki’ak,” dehan Isabel iha nia mini kampañia iha Turiskai Manufahi, segunda(07/03/2022).
Isabel haktuir molok kandidata an ba Prezidente Repúblika iha 2022, maibé halo atividade sosial barak ba povu kbiik laek sira liu husi fundasaun Sentru Quesadip Ruak, tulun ona família besik 61 liu husi programa konta bebe iha munsípiu Aileu.
Hanesan Fundasaun ita halo oituan tanba ne’e mak hau hakarak kandidata an ba Presidente Repúblika hanesan meius ida ha’u bele ajuda ema barak laos fó ajuda ba ema 61, la’os fó bolsa estudu ba ema nain 26 de’it maibé ita bele fó barak liu,” dehan Nia.
Aleinde ne’e mós sei fó kursu ba joven sira hanesan lian Korea, inglés nune’e prepara sira hodi hetan empregu atu bele halo númeru ida boot no buka oportunidade oinsa joven sira bele hetan servisu tanba idade produtivu tenke aproveita ho di’ak hodi bele hasai husi terus no ki’ak.
Tuir kalendáriu kandidtura independente Isabel Ferreia segunda ne’e (07/03/22), halo ona komísiu polítika liu husi door to door iha munisípiu Aileu hodi husu populasaun sira hili númeru 1 iha loron 19 fulan Marsu atu fasilita povu kiak nia oan asesu edukasaun liu husi bolsu estudu.
“Sé vota ba ha’u, ha’u sei ajuda imi nia oan no beioan sira, hatama sira ba eskola to’o universidade to’o servisu, imi mak fa’an modo, oan no beioan sira labele fa’an modo ona, ha’u kolia ida ne’e tanba ha’u mós nune’e, ha’u nia inan fa’an modo mais ohin ha’u la fa’an modo,” dehan Isabel Ferreira.
Jornalista : Juvita dos Santos
Editor : Agapito de Deus
