Lafaek News—Prezidente Repúblika (PR), Francisco Guterres Lú Olo, hateten nu’udar Xefe Estadu no Komandante Supremu Forsas Armadas, sei haka’as an hodi tane aas forsa srmadas naran-kmanek no defende sira-nia dignifikasaun hodi hametin koezaun unidade Estadu nian no haforsa identidade Timor-oan.
Prezidente Repúblika Francisco Guterres Lú Olo hato’o asuntu ne’e iha salaun Xina palasiu prezidensia Bairu-pite, tersa (15/02/2022), hafoin fó posse ba Brigadeiru-Jenerál Calisto dos Santos “Coliati” asumi kna’ar hanesan Vise-Xefe Estadu-Maiór Jenerál Forsas Armadas (V-XEMGFA) no Komodoru Donaciano do Rosário da Costa Gomes Pedro “Klamar Fuik”, nu’udar Xefe Estadu-Maiór Forsas Armadas (XEMFA).
Nu’udar Xefe Estadu no Komandante Supremu Forsas Armadas, ha’u sempre haka’as an atu tane aas Forsa Armada sira-nia naran-kmanek no defende sira-nia dignifikasaun, tanba konsidera nu’udar importante tebes hodi hametin koezaun no unidade estadu nian no haforsa identidade Timoroan,” hatete Prezidente Repúblika Francisco Guterres Lú Olo.
Xefe Estadu ne’e fundamenta, fiar katak Forsas Armadas kaer metin prinsípius no valores étiku, patriótiku no institusionál ne’ebé mak Instituisaun Militár iha, atu nune’e bele serbí nafatin ho di’ak ba kauza moris-di’ak no progresu, liberdade no solidariedade Timor-Leste nian.
Konfiansa ba Forsas Armadas ho sira-nia irarkia, konfiansa ba sira-nia patriotizmu no dedikasaun tomak ba ita-nia rain, konfiansa ba sira-nia knaar nu’udar Instituisaun importante tebes Repúblika nian, konfiansa ba kapasidade profisionál ne’ebé sira hatudu beibeik ona no konfiansa ba sira-nia espíritu reformista no sira-nia konsiénsia kona-ba saida mak modernidade ezije ba sira,” hatete Lú-olo.
Enkuantu Xefe Estadu-Maiór Forsas Armadas, Komodoru Donaciano do Rosário da Costa Gomes Pedro “Klamar Fuik”, hateten, sei haree programa saida mak iha estabelesidu ona saida mak presiza hadia ou reforma ida ne’e apartir ohin indiante mak komesa hala’o servisu.
Jornalista : Rita Moniz
Asisten Editór : Pedro de Almeida
