Lafaek News–Prezidente Repúblika (PR) Francisco Guterres Lú Olo, tersa (15/02/2022) fo posse Brigadeiru-Jenerál, Calisto dos Santos ”Coliati” hodi axume kna’ar nu’udar Vise-Xefe Estadu-Maiór-Jenerál Forsas Armadas (V-XEMGFA) no ba Komodoru Donaciano Costa Gomes Pedro “Klamar Fuik” simu kna’ar hanesan Xefe Estadu-Maiór Forsas Armadas (XEMFA).
Tuir Lei Defeza Nasional Vise-Xefe Estadu-Maiór-Jenerál Forsas Armadas no Xefe Estadu-Maiór Forsas Armadas, nomeia husi Prezidente Repúblika tuir proposta Governu ne’ebé antes rona uluk Konsellu Superior Defeza Militar no Konsellu Superior Defeza Seguransa, liu husi membru Governu ne’ebé iha kompetensia ba matéria defeza.
Vise-Xefe Estadu-Maiór Jenerál Forsas Armadas foun, Brigadeiru Calisto Coli “Coliati”, ne’ebé moris iha Darulete, Liquiça, tinan-62 liuba, antes ne’e asumi knaar hanesan Xefe Estadu-Maior Forsas Armadas no iha mós esperiénsia nu’udar adidu Defeza Timor-Leste iha Australia, husi 2014 to’o 2018.
Enkuantu Komodoru Donaciano Costa Gomes “Pedro Klamar Fuik”, moris iha Hatulia, Ermera tinan-53 liuba, iha tinan-10 ikus, hala’o knaar nu’udar Diretór Institutu Defeza Nasionál Timor-Leste. Komodoru Pedro Klamar Fuik mós iha esperiénsia lidera Komponente Naval F-FDTL husi 2008 to’o 2011.
Serimónia tomada de posse ne’e partisipa husi membru oitavu governu Konstituisional RDTL, reprezentante membru Parlamentu Nasionál, primeiu Nobel da Paz José Ramos Horta no Seguransa másimu husi F-FDTL, Polísia Militár.
Jornalista : Rita Moniz
Editor : Agapito de Deus
