LafaekNews-kompañia Lelo Group.Lda. apoiu uma ida ho medida 7×10 ba família kbi’it la’ek iha aldeia metin, suku Lahane orientál, postu administrativu na’in Feto munisipíu Dili, tanba duranten ne’e hela de’it iha uma ne’ebé la dignu ba família

Tuir na’in ba kompaña Lelo Group Lda., Ladislau Maria das Dores, hateten, uma ne’ebé oferese ba família kbi’it la’ek ne’e hanesan prezente ida ba família ne’e tamba ita haree, loos duni katak, família ne’e nia uma kondisaun ladi’ak

“Uma ne’e simples hanesan prezente ida ba família ne’e tamba ita haree, loos duni katak, família ne’e nia uma kondisaun ladi’ak no antes ne’e ita haree no ekipa lori sasan mai fo família ne’e, nomos ajuda husi xefe aldeia metin nian, inkluí mós ho joventude sira iha área ne’e rasik mos ajuda hahú konstroi ba uma ne’e to’o remata maib’e ita fo materia konstrusaun ba família ne’e de’it sira maka halo rasik,”Ladislau Maria das Dores. ba jornalista sira iha ámbitu serimonia inaugurasaun uma refere, iha Aldeia Metin, suku Lahane Orientál, munisipíu, Dili, (07/12/2021).

Totál orsamentu ne’ebé mak gastu ba konstrusaun uma ne’e rasik, hamutuk rihun neen, ($.6.000), inkluí mós sasan konstrusaun hanesan besi,kalen, semente, pregu no seluk tan

“Ita espera família ne’e bele kontente ho uma ne’ebé ita fó maske ki’ik maibé ita fo ho laran nu’udar Timor-oan ita tenki ajuda malu liu husi buat ki’ik hanesan ne’e nolabele atu hein governu nia prezensa,”dehan nia.

Iha fatin hanesan, xefe aldeia metin, Flavia Maria da Costa, deklara, família ne’e serteza duni moris iha susar nia laran hanesan kondisaun uma ladi’ak no tempu udan susar ba sira atu hamahan-an, maibé agradese ba kompaña Lelo Group Lda ho nia ekipa tun direita hodi fó apoiu material konstrusaun ba familia ne’e konstrui nia uma to’o ohin loron inaugura ona

“Hanesan lideransa komunitária iha aldeia ne’e(aldeia metin) agradese tebes ba kompañia Lelo Group Lda. ho nia ekipa ne’ebé maka ajuda família ne’e hodi senti netik naroman no do’ok husi susar nia laran, maske oitoan maibé ita nafatin agradese ba ekipa hotu nia esforsu,”tenik xefe aldeia Flavia Maria da Costa.

Lideransa komunitária ne’e esklarese, durante nia esforsu no buka dadus kona-ba família kbi’it la’ek ne’ebé maka iha aldeia metin suku Lahane orientál hamutuk uma kain 3 mak kondisaun uma ladi’ak ona maibé agradese tamba iha kompañia Timor-oan balun hanesan Lelo Group Lda. ne’ebé maka ajuda ona.

Ho nune’e, família benifisiariu, Bernadete de Jesus, hato’o sentimentu kontente tanba bele hetan tulun husi kompañia Lelo Group Lda entrega uma simples ne’e ba sira hodi satan hamahan netik sira

“Ha’u senti agradese tebes ba Lelo Group Lda, ne’ebé ajuda ona ami família ida-ne’e, ami nia uma uluk a’at no udan tama burus ba laran no estraga hotu sasan sira iha laran hotu, maibé ohin loron ne’e mudansa tamba kompaña ne’e fó sasan konstrusaun no ami hadi’a ami nia uma inkluí mos komunidade sira ne’e ajuda ami hodi hadi’a uma ne’e,”hateten sentimento kontente familia benefisiariu Bernadete de Jesus.

Iha  inaugurasaun ba uma ne’e  hetan misa ne’ebé dirije husi Arsebispo Metropolitania Dili, Dom Virgilho Do Carmo da Silva, ho amo paroku Balide, Pe. Grasiano Santos, hodi fo bensaun ba uma foun ne’ebé  família  atu hela ba, iha inaugurasaun ne’e hetan partisipasaun husi komunidade aldeia metin ho autoriedade lokal sira.

Jornalista :Manuel Andrade
Asisten Editór :Egidio Nono