Lafaek News—Osan nudár segundu maromak, maibé la namtate hanesan udan monu husi kalohan okos, la mosu hanesan mehi, servisu hisik kosar-ben mak foin bele hetan osan hodi sustenta moris loron-loron ho dignidade.

 Juliana Lafu idade 27 (grávida fulan 7), hosi Oe-kusse, deside servisu ho nia laen kaben Paulo Kap Elu, halo servisu ne’ebé todan pinera rai henek iha hodi responde nesesidade uma laran, bainhira  tur de’it osan mosu no la monu husi loron-matan, maibé servisu mak foin hetan osan.

Ha’u oan fulan hitu ona, pasiénsia ita tenke servisu duni, tur de’it osan laiha, loron-loron iha uma de’it se máka fó osan, entaun ita pinera rai henek ka halo netik servisu ruma atu bele hetan osan, pinera máka ha’u senti kolen tur uituan pois kontinua fali, katuas oan mesak, entaun ha’u tenke ajuda nia,” hateten Juliana Lafu ba lafaek news iha mota Komoro, seguda (06/12/2021).

Realidade moris ne’ebé inan grávida Juliana Lafu ho laen kaben Paulo Kap Elu, enfrenta máka nesesidade moris loro-loron no obriga sira tenke pinera rai-henek iha mota Komoro parte Beduku dezde tinan 2007 too ohin hodi moris.

Dadersan madrugada hader ona husi kama-leten prepara bee manas ruma hemu no hein rai nakaras hiit kanuru ho ai-suak tun ba mota-laran hodi kontinua pineira rai-henek, servisu kesi kabun too kalan hafoin han dala ida.

Dader ha’u tenke prepara uluk bee manas ruma, dala ruma la matabisu mai de’it, to’o meudia máka fila ba uma tein etu no han meudia nian. Ha’u ajuda katuas la’os fóin agora, kleur ona, maibé katuas oan máka pinera kleur desde 2007 kedas,” tenik nia.

Ho servisu ne’ebé sira halo dala ruma kontente dala ruma mós nakonu ho tristeza tanba tempu udan pinera too karreta ret ida nian derpenti udan boot mai bee lalain hotu, se sorti di’ak sei tula netik ret ida.

Senti triste bainhira rai henek ema la sosa sedu, too udan tun bee lalin hotu ita kolen de’it maibé pasensia hein udan para depois kontinua fila fali, ita esfórsu ne’e loron ida bele too karreta ret ida, rai henek nomor 2 ne’e presu $12.00, nomor 1 ne’e $.18.00, loron ida tomak ema tula ret ida de’it,” haktuir nia.

Rendimentu ne’ebé hetan husi rai henek la sosa buat murak no di’ak ida maibé jere hotu ba hahan loron loron nian no mós oan sira nia presija, tanba ida ne’e máka prioridade liu.

  Ami hanoin máka iha mota laran de’it pinera rai henek, servisu seluk ne’e laiha, husi servisu ida ne’e máka bele hetan osan hodi sosa netik fóos karon ida, modo, kafe, masin midar, masin masako no mós labarik sira nia presija loro-loron nian,” hateten nia.

Enkuantu familia Juliana ho Paulo iha oan nain haat kompostu husi feto nain rua mane nain ida, ida fóin iha isin seidauk partus, oan sira ne’e seidauk asesu ba edukasaun tanba ekonomia familia la suporta, sira nia orijinalidade husi aldeia Makelap, suku Taiboko, postu-administrativu Pante Mákasar, rejiaun Oe-kussi no dadaun ne’e hela ho familia sira iha Beduku hodi pinera rai-henek iha mota laran.

Entretantu inan gravida ne’ebé servisu pinera rai-henek iha mota laran laen rekuinese katak nesesidade máka obriga duni nune’e apoiu malu hodi buka osan para bele sustenta sira nia moris.

Tuir observasaun lafaek news nota, inan isin-rua ne’e kee rai henek no pinera iha loron manas nia okos, kosar metan suli maibé la senti kolen no hamlah, sorti iha barak ne’ebé harii besik sira taka ho karon no plastik hodi deskansa netik iha okos no hamaluk ho de’it malus ho ahu, husi sorin-sorin ema barak mós halo atividade pinera rai-henek hanesan sira halo.

Jornalista  : Pedro de Almeida

Editór        : Agapito de Deus