Lafaek News–Operasaun Polisia Nasional Timor-Leste (PNTL), liu husi Departamentu Polisia Tranzitu no Seguransa Rodoviaria (DNTSR), halo atividade pasa revista konsege prende vitura hamutuk 10-resin inklui kareta estadu ida lauza xafa matrikula no viola kodigu Estrada.
Xefi DNTSR, Inspetor Xefi Polisia, Inocencio Freitas informa, objetivu husi atividade pasa revista ne’e atu eduka nafatin sidadaun sira hodi respeita kodigu estrada nune’e bele evita asidente.
“Ema hotu ne’ebé uja estrada públiku tenki kompleta rekezitus hanesan karta kondusaun nomós asesores transporte nian, maibé balun nafatin seidauk halo tuir entaun ohin ita konsege prende motorizada 10, kareta 5 inklui kareta Guvernu ida no-mós dokumentus viaturas hamutuk 11,” dehan Inspetor Xefi Polisia, Inocencio ba Jornalista iha Kuartel Jeral PNTL Caicoli, Tersa (23/11/2021).
Inocencio relata, infrator sira ne’e maioria laiha karta kondusaun no laiha asesores hanesan xapa matrikula, lampu no mós ispellu.
“Kona-ba kareta Guvernu ida ne’ebé ohin ita prende ne’e tanba lauza xapa matrikula oin kotuk, entaun ida ne’e ita konsidera infrasaun bot ida mesmu patrimoniu estadu ita tenke prosesa”, Inocencio afirma.
Inocencio hatutan, antes ne’e deputadu sira iha Parlamentu Nasional mós kestiona kona-ba kareta sira ne’ebé modifika hodi uza lampu sorot iha oin ne’ebé kuandu halo movimentu kalan bele prejudika perturbasaun públiku no asidente ba motorista seluk, entaun ida ne’e mós tama hotu iha area operasional tranzitu nian.
Jornalista : Orlando Magno
Asisten Editór : Pedro de Almeida
