Lafaek News—Governu liu husi reuniaun Konsellu Ministru (KM), deside katak la propoin ona Estadu Emerjénsia (EE) ne’ebé termina iha loron 28 fulan Novembru tinan 2021.
Ministru Prezidénsia no Konsellu Ministru (MPKM), Fidelis Manuel Leite Magalhães hateten, hafoin análiza ba pontu situasaun epidemiolójika nasionál, ne’ebé aprezenta husi koordenadór Sala Situasaun Sentru Integradu Jestaun Krize (SIJK) no haree ba promulgasaun foin lalais kona-ba alterasaun dahuluk Lei nú. 10/2004, Lei Sistema Saúde.
“Deside la propoin renovasaun estadu emerjénsia, ne’ebé sei termina iha loron 28 fulan-novembru tuir mai,” dehan MPKM Fidelis Magalhães hafoin remata enkontru KM iha Palasio Governu Dili, kuarta (24/11/21).
Nune’e mós governu aprova projetu Dekretu-Lei kona-ba medida ezesionál no temporária vijilánsia sanitária nian ba resposta pandemia Covid-19. Kompara ho medida vijente sira no diploma mantein parte boot husi medida importa no rejista alterasaun balun, hanesan bainhira tama mai territóriu nasionál la presiza hetan autorizasaun husi Primeiru-Ministru, maibé tenke sujeita nafatin ba kontrolu sanitáriu no hatudu rezultadu negativu teste SARS-CoV-2 nian.
“Lisensa, autoridade no aktu administrativu sira seluk no dokumentu sira mantein válidu to’o loron 31 fulan-janeiru tinan 2021, bainhira prazu la fiksa tuir akordu internasionál la tuir lei ne’ebé Parlamentu Nasionál aprova tuir rezerva kompeténsia absoluta,” informa Fidelis.
Enkuantu nafatin halo izolamentu profilátiku obrigatóriu iha termu sira ne’ebé define antes ona.
Jornalista : Juvita dos Santos
Asisten Editór : Pedro de Almeida
