Lafaek News—Primeiru Ministru (PM), Taur Matan Ruak ho nia espoza, Izabel Ferreira fó Homenajem ikus ba Saudozu José António Gomes da Costa “Ma’Huno”, ne’ebé nu’udar fundadór ba nasaun Repúblika Demokrátika Timor Leste iha rejiaun mundu nian.
“Ita lakon ita nia heroi ida ho fundadór ita nia nasaun nian, ita nia nasaun lakon boot ida ne’ebé ita husu ba Aman Maromak fó fatin ba nia horik rohan laek husu ne’e nia rohan laek iha Maromak nia sorin, hodi kontinua tau matan ba ita sira ne’ebé moris atu hatutan obra ne’ebé sira husik hela, todan ba ami sira nasaun tomak iha sira nia sorin povu tomak iha sira nia sorin,” dehan PM Taur Matan Ruak, ba Jornalista sira iha Rezidénsia Saudozu Ma’huno Pantai Kelapa, Sábadu (25/09/21).
Primeiru Ministru informa, husi luta nain sira hotu ne’ebé mak liu ona, sira iha obra no memoria ne’ebé mak jerasaun ba jerasaun ne’ebé mak goza rai Timor Leste ne’e nia furak no moris livre.
“Tanba ita nia nia maun nia isin lolon mak mate maibé nia obra nia memoria sei perdura sei hela sei hanoin husi jerasaun ba jerasaun,” dehan PM.
Enkuantu Ruak husu ba Maromak atu lori koragem ba família no oan sira ne’ebé mak iha tristeza nia laran. Antes hakat ba Rezidénsia Saudozu Ma’Huno, Governu hamutuk ho nia Konsellu Ministru fó minutu Silensiu ba Saudoso José António Gomes da Costa “Ma’huno Bulerek Karathayano” iha palásiu Governu.
“Ita lakon ita nia héroi ida ho fundadór Repúblika Demokrátika de Timor-Leste, ne’ebé fó nia kontribuisaun dezde ita luta ba ukun aan, tuir mai resurjimentu no hamoris ita nia nasaun hanesan nasaun ida livre no independente iha rejiaun no mundiál,” dehan Taur.
Entretantu dadaun ne’e Ministru Asuntu Kombatente Libertasaun Nasionál (MAKLN), Júlio da Costa ‘Meta Malik’ no Sekretáriu Estadu Assuntu Kombate Libertasaun Nasionál, Gil da Costa Monteiro “Oan Soru” prepara hela kondisaun ba saudoso iha Muzeun depois mak lori ba fatin ikus tuir serimonia hanesan baibain.
Jornalista : Juvita dos Santos
Editór : Pedro de Almeida
