Lafaek News—Governu liuhusi reuniaun Konsellu Ministru (KM) aprova ona tetu agregadu no dezagregadu husi Orsamentu Jerál Estadu (OJE) 2022 ho montante hamutuk billaun US$ 1.675.
Ministru Prezidénsia Konsellu Ministrus, Fidelis Manuel Leite Magalhães hateten, aprova tetu agregadu no dezagregadu husi Orsamentu Jerál Estadu (OJE) tinan 2022 nian, ne’ebé aprezenta husi Ministru Finansas, Rui Augusto Gomes.
“Tetu agregadu iha montante totál, dolar amerikanu billaun US$1,675 hodi kobre ba nesesidade sira husi programa no prioridade nasionál sira ne’ebé define ona husi Governu Konstitusionál VIII,” dehan Ministru Fidelis, hafoin remata enkontru KM iha palásiu Governu, sesta (24/09/21).
Governante ne’e akresenta, governu define ona prioridade nasionál neen ba OJE tinan 2022, hanesan dezenvolvimentu kapitál umanu (edukasaun, formasaun profisionál no saúde), abitasaun no inkluzaun sosiál, setór produtivu sira (agrikultura no turizmu), ambiente no konektividade, dezenvolvimentu setór públiku, dezenvolvimentu rural, no governasaun di’ak.
“Husi montante totál OJE 2022, millaun $233 korresponde ba saláriu no vensimentu, millaun 449,8 refere ba beins no servisu sira, millaun $565,9 ba transferénsia públika sira, millaun $24,4 korresponde ba kapitál menór no millaun $401,7 ba kapitál dezenvolvimentu,” hateten Fidelis.
Jornalista : Juvita dos Santos
Editór : Pedro de Almeida
