Lafaek News--Tersa (07/09/2021), tuku 11 kalan, PNTL munisípiu Dili kaer membru arte marsiais PSHT iha aldeia Mundo-Perdido suku Manleuana tanba halibur malu hodi hasa’e agradesimentu hafoin sa’e sintu iha Indonézia.
Iha akontesimentu ne’e, polísia konsege kaptura ema liu 100 resin, no inklui prende motorizadas 90 inklui ho karreta 3, tanba desobendensia ba implementasaun konfinamentu obrigatóriu.
Membru PSHT hirak ne’e deskonfia halibaur malu iha membru PSHT ida ho naran insial JS nia uma iha aldeia Mundu Perdido suku Manleuana, postu administrativu Dom Aleixo munisípiu Dili hodi realiza serimonia hodi fo agradesimentu ba sa’e sintu (pengasahan) NTT Indonézia.
Hafoin ekipa konjunta PNTL kaptura membru hirak ne’e, submete kedas ba komandu PNTL munisipiu Dili hodi halo prosesu identifikasaun tuir regra autoridade seguransa nian.
Lafaek news tenta konfirma ho kedas asuntu ne’e ho komandante PNTL Munisipiu Dili, maibé seidauk bele fo informasaun tanba sei preukupadu ho servisu importante balun iha Komandu Jeral PNTL kaikoli Dili.
Entretantu tuir observasaun Lafaek News nian iha terenu nota katak, membru hirak ne’e, antes atu tuir prosesu identifikasaun dahuluk halo uluk test swab no evidénsia ne’ebe PNTL munisipiu Dili foti mak hanesan atributu Arte Marsiais inklui kareta 3 no mos motorizada hamutuk 90 resin.
Jornalista : Orlando Magno
Editór : Agapito de Deus
