Lafaek News—Inan faluk Sebastiana Gomes ho idade 67, husu governu tenke hapara ona konfinamentu obrigatóriu, tanba lori impaktu negativu ba povu kbiit laek ne’ebé laiha rendimentu loro-loron.
Faluk Sebastiana Gomes ho oan hakiak nain rua hela iha aldeia Lemokari, suku Manleuana, postu-administrativu Dom Aleixo, munisípiu Dili, moris depende faan bua ho malus hafoin hetan osan hodi sustenta nesesidade uma laran.
Ema boot sira bandu tiha ita, sorte ha’u nia oan feto (hakiak) ba hamós ema nia jardin, se la servisu ne’e atu han saida, foos agora hela karon nanotak de’it, ita halo nusa de’it hanesan ne’e di’ak liu boot sira halo mate de’it ami ona,” dehan Faluk Sebastiana Gomes (67) ba lafaek news tersa orseik (07/09/2021).
Hare’e ba atividade inan faluk ne’e nian, loron-loron faan bua ho malus, maibé iha komfinamentu obrigatoriu osan laiha ona atu sosa bua-malu hodi kontinua faan.
Ne’e oan sira mai, ha’u hato’o mata ween tun de’it, tanba uluk uluk ne’e sei di’ak bele ba faan sasan iha dalan dalan, mas agora covid-19 tama estadu taka dalan halo ha’u nervozu no hanoin barak, ha’u nervozu hakarak la’o ba mai para polisia sira kaer ha’u,” nia dehan ho mata-wen.
Iha sorin seluk Faluk Francisca de Araújo (61) mós hato’o nia preokupasaun katak durante iha komfinamentu obrigatoriu ne’e esforsu faan modo nune’e bele hetan osan uituan hodi sosa foos ruma, maibé la folin to’o namlaek no balun soe estraga iha mota laran.
Durante ne’e ha’u faan de’it modo lori la’o ba mai, modo hola tutan la barak, mai faan fali lahotu balun to’o dodok soe estraga de’it iha mota laran, uluk ne’e ema sei hola agora ne’e laiha liu, to’o foos atu han loron-loron mós hotu,” dehan Faluk Francisca de Araújo.
Bainhira lafaek news halo observasaun direta iha terrenu nota faluk nain rua nia preokupasaun hanesan liuliu nesesidade bázika, hahan uma laran la iha husu tutan vijinus sira ne’ebé hetan ona tulun hodi nune’e kalsu netik kabun ba loron sorin.
Jornalista : Pedro de Almeida
Editór : Agapito de Deus
