LafaekNews–Iha ámbitu Konfinamentu Obrigatoriu (KO) negosiante ámbulante ne’ebé faan sasán iha uma tradisional Tasi Tolu, sente triste ho rendimentu lor-loron tun maka’s.
Negosiante Amelia Gomes, preukupadu ho desizaun governu kontinua aplika konfinamentu obrigatoriu iha munisipiu Dili, maibe la tetu didi’ak impaktu ba povu kiik ne’ebe moris depende ba negosiu.
“Dezde iha loron 27 ne’ebé governu fo sai konfinamntu obrigatoriu ne’e ha’u nia sasán ne’ebé ha’u ba sosa mai tau iha tiha roda ne’e to agora ema nunka sosa hodi ha’u bele hetan fali osan inan,”dehan Amelia ho triste, iha uma adat Tasi tolu, 31/08/2021.
Negosiante ne’e sente triste tanba osan ne’ebé nia uza hodi fila liman ne’e asesu husi kréditu husi grupu Moris Rasik, kada semana tenke selu jurus $.40.00, maibé agora loron ida hetan de’it sentavus 50 susar tebes atu selu jurus.
“Osan ne’e ha’u foti iha Moris Rasik kada fulan tenke ba estor dolar 40, maibé durante semana ida ona ema seidauk sosa sasán ne’ebé hodi hetan osan hun atu ba stor iha semana ida nia laran, durante loron ida ona ne’e ema sosa mak $50 centavus loron ida ne’e to agora ami nia oan inan seidauk fila hodi ba store iha moris rasik,”Amelia ko’alia ho halerik.
Tuir povu kiik ne’e, uluk seidauk iha konfinamentu obrigatoriu ne’e sasán loron hetan to’o $ 40, dalaruma liu, maibé agora serka sanitaria husi loron 27 Agostu to’o agora ema la sosa dala ruma ema la sosa.
‘‘Ha’u nia oan sira han too hotu de’it, ha’u la hatene semana ida ne’e ha’u atu ba stor saida ba moris rasik,”tenik negosiante Amelia Gomes.
Amelia Gomes, ho nia kaben Miguel dos Santos, iha oan hamutuk na’in ualu, husi postu administrativu Atsabe, munisípiu Ermera, durante ne’e nia kaben serbisu iha saneamentu Munisípiu Dili, no Amelia rasik faan de’it sasán iha uma adat tasi hodi sustenta moris no selu oan sira nia eskola.
“Ha’u nia kaben serbisu iha saneamentu no ha’u faan de’it sasán hodi sustenta oan sira nia eskola no hahán uma laran nian, tanba oan sira eskola hotu entaun ami tenke buka moris hanesan ne hodi dudu oan sira ba oin,”esplika Amelia.
Nia rekomenda, husu ba nai ulun sira atu foti desizaun ruma tenke hare la’o povu nian moris.
“Husu ba nai ulun sira atu hare netik ami povu kiik ne’e, ami husu nai ulun sira kuandu foti desizaun ruma hare lai ami kiik sira nia moris labele povu hamlaha hela ita boot sira mai haruka ami sulan fali iha uma,”hakotu Amelia.
Enkuantu iha loron 27 fulan Agostu 2021, governu liuhusi reuniaun konsellu Ministru impoin hikas konfinamentu domilisiariu iha Munisípiu Dili.
Observasaun Lafaek News nota, iha fatin faan sasán ka tiga roda laran mak hanesan kafé, sigaru, ABC MOCA, Gresh, no seluk tan, maibé ema la iha atu sosa.
Jornalista : Egidio Nono
Editór : Agapito de Deus
