Lafaek News–Bispo Dioseze Baukau Dom Basílio do Nacimento, liu husi karta Ministériu Saderdotal, ofisiálmente suspende padre Martinho Germano da Silva Gusmão, husi uma kreda nu’udar nai-lulik.
“Hatan ba Padre Martinho Germano da Silva Gusmão, nia vontade no desizaun, bainhira prosesu kanóniku sei la’o Hela, ha’u nu’udar Bispo Dioseze Baucau dekreta suspensaun ministériu saserdotál, katak hahú loron 20 de Agostu 2021 ba oin, hapara padre ne’e nia atividade sira hotu ne’ebé sakramentu orden haraik ba nia atu hala’o iha uma kreda,”dehan Dom Basílio do Nascimento, liu husi karta ne’ebé lafaek News asesu, iha 31/08/2021.
Karta husi Bispo Dioseze Baukau ne’e, bazeia ba ba karta ne’ebé Padre Martinho Gusmão hato’o ba iha Diosezanu iha loron 25/01/2021 hodi husu renunsia ministériu saserdotál, katak hapara nia atividade nu’udar nai lulik.
“Kona-ba estadu demisaun ne’e katak Padre Martinho Gusmão la moris ona nu’udar nai-lulik ne’ebé simu sakramentu orden, Se apostólika amu papa de’it mak sei demite padre Martinho Germano da Silva Gusmão, husi nia estadu klerikal,”esplika iha Nota.
Nune’e karta ne’e rasik hateten, iha loron 4 fevereiru 2021, padre Martinho Gusmão haruka ona karta ba santu padre hodi husu demisaun estadu klerikal, katak atu la moris tuir ona estatutu nai- lulik nian.
Jornalista : Egidio Nono
Editór : Agapito de Deus
