Lafaek News (Lautem)–Katuas ida ho nia fen lori kilat manu (senapan) tiru kanek veteranu 24 anus, Armando Matansa kanek iha parte hirus matan iha aldeia Luturula suku Leuro postu administrativu Lospalos munisipiu Lautem.
Komandante PNTL munisipiu Lautem, Antonio do Rego Fernandes, haktuir kronolojia husi akontesimentu ne’e mosu iha loron kuarta (11/08/2021) tuku 7 kalan, hafoin vitima (veteranu 24 anos) fila husi toos, derepente autor nain rua fila husi toos liu husi vitima ninia uma oin kaer hela kilat manu iha liman, nune’e autor komesa kedan ho liafuan kroat provoka vitima sira nain rua diskute ikus mai autor foti kilat tiru kedan vitima nia hirus matan tutuir malu.
“Sira haksesuk malu ho Vitima ikus mai suspeitu sira tiru vitima ho kilat manu no balamusan kona vitima nia isin lolon parte hirus matan liman karuk, akontesementu ne’e akontese iha aldeia luturula suco leru maijumenus tuku 7 ho balun kalan,’’ Antonio Rego Fernandes, lafaek news iha kna’ar fatin Lautem, kinta (12/08/2021).
Komandante PNTL Lautem ne’e reafirma, hafoin simu informasaun kona-ba akontesimentu ne’e nia parte orienta kedan membru polisia sira kaptura kedan autori nain rua (fen-laen) detein iha sela PNTL Lautem nian.
“Juventude sira lori kedan vitima Matansa, ba sentru saude internamentu Lospalos, parte saude halo karta pedidu hodi transporta vitima ne’e ba nasional, tamba balamusan belit metin hela iha vitima nia hirus matan,” nia haktuir.
Entretantu, kazu PNTL munisipiu Lautem aprezenta ona ba ministeriu publiku hodi prosesa tuir lei, tanba iha prosesu kapturasaun autor (fen-laen), rekoilla mos evidensias hanesan kilat musan 2 ho katan ida hodi asegura iha PNTL Lautem.
Jornalista :CE. Lautém
Editor : Agapito de Deus
