Lafaek News-Prezidente Republika Francisco Guterres Lu Olo afirma edukasaun sívika importante tebes hodi votante ida-idak hatene ho konxiénsia rasik vota ba partidu ida, Nunee CNE, partidu polítiku no organizasaun sosiedade sivíl sira halo edukasaun sívika prosesu eleitoral ba populasaun atu komprende kona-ba eleitoral.
Xefe Estadu hatoo asuntu ne’e husi diskursu hafoin loke workshop ho tema evolusaun Demokrasua iha Timor Leste iha salaun Laline LarigutoCNE Kolmera, kinta (12/08/2021).
“Edukasaun sívika importante tebes hodi votante ida-idak hatene ho konxiénsia rasik vota ba partidu ida ne’e ka ida seluk. Tanba ne’e mak CNE, partidu polítiku no organizasaun sosiedade sivíl sira halo edukasaun sívika kona-ba prosesu eleitoral,” dehan Xefe Estadu Francisco Guterres Lu Olo.
Nia dehan, edukasaun sívika ne’e tenke fó-hanoin ba sidadaun sira atu hili partidu sira ne’ebé iha programa no estatutu di’ak, la’ós haree de’it ba líder ka personalidade ruma iha partidu, nune’e, kompromisu eleitorál mak sai sasukat lolos ba ukun-nain sira ne’ebé povu hili.
“Ita hotu hanesan sidadaun Timor-Leste presiza iha konxiénsia klean katak demokrasia la’ós fó de’it biban ba Povu vota iha eleisaun ba Prezidente Repúblika no ba eleisaun lejislativa hodi partidu sira manán assentu iha Parlamentu Nasional no kaer governasaun ba ita-nia rai, Ita nia Demokrasia hetan ona rekoñesimentu nasional no internasional maibé ita sei presiza hala’o no lori ba oin di’ak liután hodi hadi’ak Povu nia moris,’’ dehan PR ne’e.
Observasaun Lafaek News sita, lider instituisaun soberanu sira ne’ebe partisipa iha eventu importante ne’e mak hanesan, PR Francisco Guterres Lu Olo, PPN Aniceto Guterres, Primeiru Ministru Taur Matan Ruak, prezidente CNE, lider partidus politikus no membru governu sira.
Jornalista : Rita Moniz
Editor : Agapito de Deus
