Lafaek News–Vise Ministru Interior (VMI), Antonio Armindo akompañia husi Komandante Unidade Patrollamentu Fronteira (UPF), halo sosializasaun ba komunidade sira iha aldeia Railuli suku Kova postu administrativu Balibo munisípiu Bobonaru kona-ba asegura fronteira terrestre atu ema labele tama sai entre Timor Leste ho Indonesia husi dalan ilegal.
Vise Ministru Interior, Antonio Armindo informa, iha nia parte husu komunidade sira ne’ebé hela besik iha fronteira bainhira hetan ema oin foun iha aldeia no suku laran fo hatene kedas ba parte seguransa nune’e bele investiga kedas ema ne’e.
“Governu husu populasaun hotu ne’ebé hela besik fronteira atu kontribui ba seguransa sira, bainhira hetan ema oin foun labele hirus no halo asaun fíziku ba sira, maibé imi tenke lalais fo hatene ba Autoridade Seguranga nune’e ita bele hatene sira nia hakarak ne’e saida,?” V-MI Antonio Armindo liu husi nia diskursu iha Railuli Bobonaro, segunda 02/08/2021.
Antonio esplika, komunidade ne’ebé hela besik fronteira nafatin ajuda governu hodi proteje fronteira nune’e moras variante ho Corana virus labele tama iha Timor-Leste.
“Ita nia maluk sira neebe dadaun nee iha mota sorin mak mai la liu husi dalan legal mak ita boot sira hetan fo hatene kedas ba parte seguransa ho saude nunee lori sira ba kuarentina antes sira ba sira nia familia ka hela fatin tanba ita lakoi sira mai lori fali moras nee atu hadeat ba ema seluk” Nia sujere.
Iha fatin hanesan, Reprezenta Xefe suku, Cipriano Noronha hatete, ohin partisipa serimonia sosialiazasaun husi Vise ministru interior konaba liña fronteira liu liu ba seguransa tanba atu prevene uluk moras variante delta ho COVID-19 iha fronteira.
“Ohin vise minitru interior ho nia ekipa mai iha nee (aldeia Railuli), hatoo mai aki konaba seguransa iha liña fronteira nee atu halo seguransa didiak nunee variante Delta la bele cirkula iha rai laran,” Cipriano afirma.
Reprezenta xefe suku nee esplika, ba oin autoridade lokal suku hamutuk ho komunidade sira sei servisu hamutuk ho parte seguransa liu liu ho Unidade Patrollamentu Fronteira (UPF), nunee bele minimiza ema liu iha dalan ilegal.
“Ita presiza servisu hamutuk ho ita nia seguransa sira nunee moras variante delta la bele cirkula iha ita nia rai laran,” nia akresenta.
Nia relata, konunidade sira neebe ohin partisipa iha sosializasaun nee husi suku Kova kompostu husi aldeia 5 futatas, Bawai, Lalis, manehaat no railuli.
Entretantu tuir observasaun jornalista Lafaek News nian iha terenu kata, komunidade sira sente kontente tebes bainhira haree Vise Ministru Interior too iha sira nia aldeia no suku maske dalan no mos komunidade sira hatoo obrigadu wain ba governante nee ninia prezensa.
Jornalista : Orlando Magno.
Editór : Agapito de Deus
