Lafaek News—Vasina AstraZeneca nu’udar substánsia ida ne’ebé bele hasa’e ema-nia imunidade hodi luta hasoru virus Covid-19 ho nia efeitu sekundáriu haat hosi vasina Covid-19, no munizasaun ne’e seguru inklui efeitu sekundáriu hosi imunizasaun ne’e temporáriu de’it iha ema-nia isin.
Efeitu sekundáriu hosi vasinasaun ne’e mak hanesan, sente moras iha kabaas sona fatin, sente kolen, isin moras no isin manas, maibé efeitu hirak ne’e hatudu katak vasina ne’e funsiona duni atu proteze ema hosi infensaun Covid-19, tanba ne’e temporáriu de’it iha ema-nia isin lolon.
“Maibé lalika hakfodak bainhira simu vasina hetan nia efeitu sira hanesan isin manas no seluk tan, maibé ne’e hanesan baibain, tanba imunizasaun hotu-hotu sempre iha nia reasaun,” informa Diretór Saúde Munisípiu Ermera, António de Deus, hafoin, abertura ba imunizasaun Covid-19 iha edifísiu Autoridade Munisípiu Ermera, Kuarta, (14/04/2021).
Nia dehan, vasina Covid-19 ne’e importante tebes atu ema hotu bele hetan, tanba bele proteze ema hosi komplikasaun sériu hosi Covid-19, tanba ne’e imunizasaun ne’e nia efeitu sempre iha maibé pozitivu ba ema nia isin tanba ne’e lalika tauk atu tuir vasinasaun.
“Imunizasaun ida ne’e importante ba ita hotu atu simu iha momentu ida ne’ebé mak ita hasoru hela pandémia Covid-19, tanba ne’e lalika hanoin seluk hodi tuir vasinasaun,” tenik nia.
Nia afirma, ema sientista sira halo ona monitorizasaun ba informasaun beibeik hosi fontes ba sinál ruma ne’ebé hatudu karik vasina ne’e fó risku ba ema-nia saúde, tanba ne’e husu atu públiku labele hakfodak simu vasinasaun hosi pesoál saúde sira.
Enkuantu Prezidente Autoridade Munisípiu Ermera, José Martinho dos Santos Soares, fó korajen ba funsionáriu inklui populasaun tomak iha munisípiu Ermera atu hotu-hotu partisipa iha vasinasaun ne’ebé inisia hosi governu atu halo prevensaun ba surtu Covid-19 iha Timor Leste.
“Ha’u fó korajen ba ita hotu-hotu, ba komunidade hotu iha munisípiu Ermera nian atu bele prepara-aan hodi simu vasinasaun hosi ita-nia pesoál saúde sira, labele rona rumoris sira ne’ebé esplla iha mídia sosiál ne’ebé seim razaun,” nia fó korajen.
Jornalista : Lino Aparicio
Editór : Agapito de Deus
