Lafaek News—Xefe Gabinete kontrolo Kualidade komunikasaun sosiál, Sara Maria F. Xavier, informa bazeia ba dadus iha tinan 2020 Ospitál Nasionál Guidu Valadares (HNGV) rejista kazu mortalidade hamutu 987 no salva vida (alta) hamutuk 21.687.
“Totál pasientes ne’ebé mak mate iha HNGV durante tinan 2020, hamutuk 987, no pasiente ne’ebé baixa iha tinan 2020 hamutuk 22.674, husi totál ne’e, sira ne’ebé mak alta hamutuk 21.687,” esplika Xefe gabinete kontrolu kualidade komunikasaun sosial, Sara Maria F. Xavier, ba jornalista sira iha nia knar fatin HNGV, Bidau, Tersa (16/02/2021)
Nia haktuir, totál pasiente ne’ebé mak tama iha emerjénsia durante tinan 2020 nia laran, hamutuk 50.375, husi numeru ne’e, alta husi emerjénsia hamutuk 28.837 , no mate iha dalan antes to iha emerjénsia hamutuk na’in 92, no na’in 119 mak mate iha emerjénsia no totál labarik sira ne’ebé mak baixa iha pedeatria tinan 2020 hamutuk 2364, alta hamutuk 2208, totál mate 156 labarik, maioria kazu ba labarik sira baixa iha pedeatria ne’e mak infeksaun respiratoriu, dengue, diarea, má Nutrisaun no infeksaun sira seluk hanesan iha kakutak,
Nune’e nia salienta, totál inan ne’ebé baixa iha maternidade hamutuk 5643 inan, husi totál ne’e inan ne’ebé mak partus hamutuk 5577, inan ne’ebé mak partus normal hamutuk 4134, partus sejariana hamutuk 1093, no inan ne’ebé mak partus liu husi ventoza hamutuk 368, enkuantu inan sira partus kada loron ne’e hamutuk 15.
Inan ne’ebé mate iha tinan 2020 ne’e hamutuk na’in 7, kompara ho tinan hirak liu ba kotuk numeru ne’e tun, iha tinan 2016 inan ne’ebé mate hamutuk 33, iha 2017 hamutuk 18, tinan 2018 hamutuk 24, tinan 2019 hamutuk 10, signifika katak ita komesa hadi’a ona ita nia atendimentu enkuantu sira na’in 7 ne’ebé mak mate ne’e kauza husi hemorajia, hipertensaun,infeksaun no kazu komplikasaun sira seluk, tenik nia
Jornalista : Sandi Belo
Asisténsia Editór : Egidio Nono
