Lafaek News—Xefe suku Madohi, Bernardino de Cristo Ferreira, infórma relasiona ho kazu pozitivu Covid-19 ne’ebé deteta iha aldeia Terra Santa no ba konfinamentu obrigatóriu, Ministériu Saúde (MS) no ekipa Sentru Integradu Jestaun Krije (SIJK) tenke hadia nesesidade hodi halo atendementu ho dignu ba sira ne’ebé afetadu Covid-19.
“Ha’u husu ba ministériu saúde no ekipa SIJK katak komunidade ida ne’ebé maka identifikadu ne’e presija iha atendementu di’ak tanba foin dadauk sira kestiona ona, tanba kondisaun inkondisional, iha orientasaun husi ha’u nia sidadaun ne’ebé maka positivu no nia familia rasik kestiona katak, tanba saida maka orseik lori sai husi uma maibé to’o agora laiha hahan no bee para sira hemu,” dehan Xefe Suku Madohi, Bernardino de Cristo Ferreira, ba lafaek news liu husi via telefóne, segunda, (8/3/2021).
Lideransa komunitariu ne’e hatete, povu prontu atu kopera hodi kumpre regras MS maibé presiza kria kondisaun di’ak nune’e bele halo atendementu ho dignu.
“Sidadaun prontu atu kumpre orden ne’ebé maka iha, maibé ida ne’ebé maka afetadu bainhira ba konfinamentu karik kondisaun konfinamentu ne’e presiza hadia nesesidade, presiza iha aihan atu sira haan, be’e para sira hemu no tenke atendementu dignu ba komunidade sira, tanba familia sira preokupa no ha’u nu’udar xefe suku mós perguntas bo’ot ida ba ami, kestaun ida husi ha’u no familia husu dala ida tan ba SIJK hare’e kondisaun antes lori komunidade ne’ebé maka afetadu ba konfinamentu,” nia rekomenda.
Bernadino akresenta nia parte sei hamutuk ho autoridade lokál inklui ho KPK aviza tama sai aldeia atu komunidade sira labele pániku no kumpre regras tuir medias prevensaun covid-19.
“Ita fó hanoin nafatin ba komunidade sira atu bele hakmatek hodi identifika maluk sira ne’ebé deskonfia para ita prevene, no halakon paniku ne’emaka orseik to’o agora ne’e, ami tama sai bairo fó hanoin labele pniku maibé presija kumpre regra ne’ebé maka iha tenke distansiamentu sosiál no uza maskra no fase liman,” nia informa.
Jornalista : Pedro de Almeida
Editora : Nelya Barros