Lafaek News—Loron (17/01/2023), Prezidente Repúblika José Ramos-Horta hasoru malu ho Primeiru Ministru Kosovo Albin Kurti, hodi ko’alia kona-ba kooperasaun entre rai rua
Enkontru bilateral ne’e, hanesan ajenda privada husi Prezidente Repúblika, durante Forúm Ekonómiku Mundiál ne’ebé hahu iha loron 16 to’o 21 fulan Janeiru iha Davos Suíça.
“Fórum Ekonómiku Mundiál ne’e atu deskuti medida adaptasaun sustentál ba panorama mundu ne’ebé afetadu husi akesimentu polar, liu husi servisu hamutuk ho aliansa sientista sira, povu indíjenas, foin sa’e, empreza, sosiedade sivil no inovadór sira”, Lafaek News sita husi média Palasíu Presidensiál, Kuarta (18/01/2023).
Enkuantu Prezidente Repúblika José Ramos-Horta mós sei ko’alia iha reflesaun kona-ba lideransa ligada ho vizaun inserteza ba mundu agora, kresimentu lideransa atu assume diferente formas no signifikativa ne’ebé ejize auto esplorasaun.
Xefe Estadu mós sei hola parte iha dikusaun iha ámbitu seleberasaun loron Deklarasaun Universal Direitus Humanus ba dala 75 ne’ebé sai hanesan baze fundamental bá direitus no liberdade sidadaun nian, nune’e mós sei partisipa iha diskussaun meza redonda kona-ba jeopolítika, kooperasaun global no mós hasoru malu ho alta entidade husi nasaun oi-oin no investidór balun, hodi ko’alia kona-ba programa kooperasaun iha área oi-oin.
Jornalista : Rita Moniz
Editór : Agapito de Deus
