Lafaek News–Ministra Saúde (MS), Odete Maria Freitas Belo informa, sira tuur la hakmatek tanba preokupa tebes ho númeru moras dengue ne’ebé sa’e makaas, tanba iha Óspital Nasionál Guido Valadares (HNGV), tuir mai sei lori hotu ba Tasi-Tolu.
Sé mak tuur hakmatek, ami la tuur hakmatek, ami kalan mós ami lao mak ne’e, ita boot sira toba ne’e, ami ba óspital haree fatin ema nain rua tuur ne’e halo nusa, rezolve atu lori ba ne’ebé, se tuur hakmatek karik oinsa mak pasiente sira lori ba Vera Cruz, imi mak lori ba lae, pesoál saúde la toba nemak mobiliza ema sira ne’e ba Vera-Kruz,” dehan MS, Odete Belo, iha Palasiu Governu Dili, kuarta (26/01/22).
Odete akresenta, ba da-daun ne’e Ministériu Saúde prepara ona fatin iha Tasi-Tolu, karik kazu ne’e aumenta tenke lori ba Tasi-Tolu.
Ita ko’alia Covid 19 tanba ita boot sira haree covid 19 ne’e hapara atividades ekonomika nian, sosial nian, entaun ita labele tau asuntu rua ne’e hanesan, Covid 19 nian ne’e mundu, maibé dengue laos ida ne’e tanba dengue moras ida ne’ebé mak moris ona ho ita, depende ba jestór sira atu jere moras ne’e halo nusa, infelizmente ha’u hanesan ministra ha’u tun ba haree,” informa MS.
Enkuantu husu ba Ministériu relevante sira seluk hanesan Ministériu Obras Públikas, Ministèriu Administrasaun Estatál atu ajuda tau matan ba limpeza iha Dili laran, liu-liu kalen aat no lixu sira ne’ebé sai fatin ba susuk nian.
Ha’u husu ba komunidade sira, oan sira ne’ebé mak moras ona, favór ida ida ne’ebé hela iha uma ne’e hakmatek iha uma, tanba susuk ne’e gosta tata iha rai loron,” hakotu MS Odete Belo.
Entretantu iha fulan Janeiru tinan 2022, munisipiu Dili rejista kazu moras dengue hamutuk atus haat hitunulu resin.
Jornalista : Juvita dos Santos
Editor : Agapito de Deus
