Lafaek News–Inundasaun iha Tasi-Tolu, provoka komunidade Celestina Freitas, sente la satisfas hodi hasai lia-fuan ameasa sei la vota iha eleisaun Prezidente nian no bolu fali ikan sira iha tasi laran hodi vota ba nai ulun sira.
Estadu dudu tiha uma ne’e la ateru kedas ami mak sai fali vítima ba udan been, tanba ne’e husu ba estadu aban ka bainrua tenke mai ateru ona uma fatin ne’ebé sira dudu se kleur entaun aban bainrua eleisaun prezidente ami la ba vota bolu ikan sira iha tasi laran nee mak mai vota ba sira,” dehan Celestina ba Lafaek News iha nia rezidensia tasi tolu Dili, Segunda 15/11/2021.
Hodi dehan, tinan uluk seidauk dudu komunidade ne’ebé hela iha estrada ninin, bee la tama uma, maibé agora govenu dudu tiha uma hirak ne’e la ateru kedas entaun komunidade seluk mak sai fali vítima.
Estadu mai dudu uma ne’e signifika atu realiza ona sira nia mehi agora dudu tiha uma sira nee la ateru kedas ami mak vitima fali, agora ami toba mos ladiak hanesan nee ami hamrik deit too loron ona,” Celestina esplika.
Celestina husu ba governu atu ateru estrada no mos uma fatin ne’ebe kompania sira sobu ona, nune’e bee labele tama komunidade nia uma bainhira iha tempu udan tanba bee la’o tuir nia fatin.
Iha sorin seluk vítima inundasaun Tasi tolu, João de Araujo argumenta, udan durante oras rua mak bee tama sira nia uma, no nia mos konsidera impaktu husi foin lalais governu dudu sees komunidade nia uma, maibé la ateru kedas atu bee bele la’o tuir nia dalan.
Kona-ba sasan uma laran ami konsege salva balu maibe balun ami la konsege salva hanesan labarik sira nia dokumentu ne’e ami salva hotu, maibé sasan dapur ami la salva,” João relata.
Entretantu Observasaun Jornalista Lafaek news nian iha terenu katak, komunidade balu lakon ninia sasan hanesan, jelera, sasan dapur, fós no sasan selun neebe iha uma laran tanba la konsege atu salva husi bee ne’ebé tama uma laran.
Jornalista :Orlando Magno
Editór : Agapito de Deus
