Lafaek News—Ministériu Transporte Telekomunikasaun (MTK), segunda (25/08/2025), realiza semináriu nasional ho tema driving digital transformation in Timor Leste, ba estudante pre-sekundára no sekundára atu oinsá utiliza aplikasaun Google hodi bele fasilita informasaun husi Sistema teknolojia dijitál.
Iha semináriu ne’e, Ministru Transporte Telekomunikasaun, Miguel Manetelo esklarese, objetivu hosi semináriu ne’e oinsá atu ajuda setor edukasaun inklui joven sira ne’ebe halo konten kriatór hodi utiliza dijitál ho di’ak.
“Iha preokupasaun rua priméiru ida oinsá mak Google bele ajuda iha setor edukasaun, no iha ida seluk Timor mezmu populasaun menus maibé joven barak kreativu ba kontén kreatór, tan ne’e ha’u mos konvida Sekretaria Estadu Komunikasaun akompaña ha’u ba hasoru Google iha Jakarta, atividades ida ohin hanesan rezultadu ida husi reuniaun iha Jakarta ohin aprezentasaun barak liu oinsá utiliza Google ba iha setor edukasaun atu fasilita ita nia profesor sira hanorin ho di’ak liu no estudante sira bele buka informasaun husi aplikasaun husi Google,” MTK Miguel Manetelo relata ba jornalista sira iha CCD, segunda (25/08/2025).
Ministéríu Transportasaun no Komunikasaun ho Ministériu Edukasaun, hakarak prepara estudante Timor-Leste, atu nune’e sira la’o de’it hanesan uza-teknolojia ne’ebé iha inovasaun tebes iha nasaun ne’e.
Iha fatin hanesan, Ministra Edukasaun Dulce de Jesus Soares, mos afirma kona-ba transformasaun dijitál ohin loron sei ajuda estudante sira, Ministériu Edukasaun mos sei esforsu tulun estudante sira atu asesu iha merkadu traballu.
“Transformasaun dijitál iha Timor-Leste, uza plataforma hodi fo inovasaun abilidade, agora iha mundo globalizasaun no mundo ida ne’ebe evolusaun bebeik, Ministériu Edukasaun ho responsabilidade bo’ot atu prepara estudante sira ba transformasaun sira ne’ebe mosu atu nune’e sira bele susesu iha merkadu servisu nian, ami mos iha kompremisiu boot atu hadia estudante sira nia aprendizajen iha liu hosi maneira teknolojia dijitál,” Nia esplika
Abilidade sira-ne’e sei ajuda estudante sira atu dezenvolve fleksibilidade no abilidade análiza ne’ebé sei presiza atu hetan servisu neʼebé seidauk inventa, maibé sei sai nesesidade boot iha futuru
Estudante husi Escola Amigo de Jesus, Valeron Costa sente orgullu tanba ho aplikasaun AI bele hetan buat foun no bele fo tulun atu buka informasaun husi aplikasaun ne’e rasik.
“Sente orgullu tamba bele hetan buat foun kona liu ba iha Artefisual Intelejénsia (AI) maneira atu halo esplikasaun, iha mos maneira utiliza Al ho lolos, vantajen mak la fo prioridade ba profesor sira atu bele esplika tuir sira nia hakarak, dala barak mos fo prioridade ba estudante sira atu bele hatene no komprende liután, ha’u senti di’ak tebes tanba ida ne’e benefisiu ba future, Valeron Costa ba Jornalista Sira iha salaun CCD kaikoli Dili
Observasaun Lafaek News nota iha semináriu ne’e hetan partisipasaun másimu hosi estudantes kompostu hosi pre-sekundária no sekundária hamutuk 500, no hetan oportunidade uza Google Workspace, inklui Google Classroom, Docs, Sheets, no Slides, hodi aprende kolabora bá traballu no real material.
Jornalista: Maria J. de Jesus/Jonaida Corte Real.
