Lafaek News—Konsellu Másimu Partidu Kmanek Haburas Unidade Nasional Timor-Oan, José dos Santos Naimori Bucar, hakat too iha Wemori hodi vizita kondisaun moris hosi saudozu Sebatisão Gomes nia aman, Afonso Gomes iha aldeia Wemori suku Wemori postu administrativu Vikeke munisípiu Vikeke.
Lider supremu ho Prezidente Partidu KHUNTO, José dos Santos Naimori Bucar ho Armanda Berta dos Santos, too iha saudozu Sebastião Gomes nia rejidénsia Wemori iha loron 23/08/2025, iha oras haleu tuku 7 : 30, no simu direta hodi aman Afonso Gomes (aman saudozu Sebastião Gomes).
Lider supremu KHUNTO, Jose dos Santo Naimori Bucar hateten vizita ne’e atu fó onra ba Saudozu Sebastião Gomes nia aman no familia tomak ne’ebe se hirus matan no sakrifika-an ba Timor Leste nia Independénsia
“Ha’u mai atu fo onra ba familia Sebastião Gomes joven ida ne’ebé brani, joven ida ne’ebé se hirus matan ba rai ida ne’e, nia luta mak ohin loron ita halo polítika, sira nia luta maka ohin loron fo liberdade ba ita hotu, entaun ita fó onra ba sira, ha’u la mai hanesan polítika maibé ha’u mai hanesan familia no hanesan Timor-oan, ita hotu tenke rekoñese sira nia luta ba ita nia rain,” Lider KHUNTO ne’e esklarese.
Iha vizita ne’e, fundador partidu KHUNTO ne’e hatoo nia mensajen ba joven hotu iha Timor Leste, atu aten brani hanesan saudozu Sebastião Gomes, kontra injustisa ne’ebé akontese ba povu Timor iha tempu ne’eba too ema hakotu ninia vida tanba harak ukun rasik-an.
“Ba Joven Timor Laran tomak tenke aprende hosi saudozu sira nia luta tanba sira nia brani defende lia-loos, sira nia brani defende rai ida ne’e, sira nia brani mak liberta rai ida ne’e,” Naimori fundamenta.
Iha fatin hanesan, reprezentante Familia Saudozu Sebastião Gomes, João da Costa Soares haktuir, durante ne’e sempre halo esforsu tomak ba kondisaun saúde Saudozu Sebatião Gomes nia aman Afonço Gomes, hodi lori ba halo konsulta iha hospital.
“Pai nia kondisaun durante ne’e ami lori ba HNGV dala hat, tanba apa nia kondisaun bainhira moras ne’e grave liu, ami sempre tau matan kuandu moras ami komunika ambulánsia hodi lori ba konsulta, pai nia kondisaun mak hanesan ne’e ona tanba ho idade 80 resin ona,” familia ne’e haktuir.
Entretantu, Saudozu Sebastião Gomes hanesan joven aten brani, la tauk no la hakfodak iha inimgu nia matan, brani hasoru liman kroat ikus manan ho loron 12 Novembru 1991, akontese masakre boot tebes iha Timor Leste hodi loke komunidade internasional ninia matan hateke ba Timor Leste nia luta, ohin loron Liberdade iha ema hotu nia matan.
Jornalista: Mateus F. de Deus
