Lafaek News-inan faluk Mariana Naha-lay idade (78), hela iha uma ho kondisaun la dignu, hahan uma laran la sufisiente, esperansa moris di’ak laiha ona, tanba militar Indonézia halo torturasaun hasoru Naha Lay iha akontesimentu trajedia Marabia loron 10 fulan Junhu tinan 1980.

Faluk Mariana orijen husi munisípiu Aileu, maibé hela iha Dilí dezde tempu kolonializasaun Portugues, residénsia atual  iha aldeia Raimean suku Lahane Oriental postu administrativu nain feto munisípiu Dilí.

Hela fatin faluk Mariana hela iha uma barraka didin haleu ho au-pafulu ho medida 7×6, didin hirak ne’ebé haleu uma ne’e lahuk no kuak tutuir didin lolon husi uma laran hateke borus husi uma laran too liur, la seguru iha tempu kalan no la seguru iha tempu udan no anin boot.

“Ha’u oan mane laiha ne’ebé se loos atu ajuda ha’u, tanba iha oan feto rua maibé ida mate tiha ona no hela ida de’it forma uma kain no hela iha Aileu,”Dehan inan faluk Mariana Naha Lay ho tristeza ba lafaek news iha nia residensia aldeia Raimean suku Lahane oriental postu administrativu nain feto munisipiu Dilí foin lalais ne’e.

Inan faluk Mariana nia kaben Naha Lay, fila hikas ba mundu seluk tanba simu torturasaun husi militar Indonesia iha trajedia Marabia Dilí 10 de junu, maske nune’e inan faluk ne’e la ezije estadu atu valoriza nia kaben ninia mate tanba libertasaun nasionál, tanba luta la’os kontratu, luta la’os iha akordu bainhira Ukun Rasik An sei simu salariu, maibé importante valoris feto faluk no oan kiak sira nia halerik.

Terus ne’ebe inan faluk Mariana hasoru laiha entidade ida maka tau matan hodi hasai inan faluk ne’e husi terus no susar ne’e,hateke ba uma ne’ebé nia hela la merese duni atu hela, tanba didin ho au-betun no kalen fruzen balun no kuartu  4 no luan 2×2, susar atu book an ba mai,no laiha sala de visita no didin sira iha kuartu laran komesa fuhuk no a’at ona inklui ai-rin ne’ebé sai forsa rahan uma ne’e lahuk da-daun husi rai-okos.

Iha tempo kalan inan faluk ne’e fiar de’it ba maromak liu husi orasaun loron-kalan iha oratoriu ne’ebé hafutar ho ilhas Nossa Senhora de Fatíma no ilhas Kruz ne’ebé hatuur kedan iha  kuartu laran maske oratoiru ne’e rasik mos a’at ona no lahuk, tanba udan be’en kona liu husi kalen kuak borus too kuartu laran.

“Ida ne’e maka ha’u nia toba fatin didin sira dodok hotu no ha’u toba de’it iha hadak nia leten, no oratóriu mak ne’e atu hasa’e hau nia  orasaun ba maromak,”nia hateten.

 Faluk ne’e mos laran susar ho nesesidade uma laran liu-liu aihan, uma laran laiha foos ho batar hodi bele prezerva moris ne’e, ho laran di’ak husi vizinu sira ajuda aihan bikan ida kada loron hodi sustenta faluk ida ne’ebé lakon nia kaben tanba hetan torturasaun husi militar Indonézia hodi husik nia moris susar hanesan ohin loron.

“Ha’u dala ruma han deit maka ai-farina ho fehuk sira ne’e, tanba ita atu han etu maibé osan iha ne’ebé atu sosa?, se maka atu leba modo tahan dala ruma beioan sira ba sosa netik foos lata ida ka rua mai han netik, iha han se laiha pasiensia, han de’it maka modo tahan sira iha to’os laran ne’e fehuk tahan,ai-farina tahan no seluk tan,”nia deklara.

Ho idade inan faluk Mariana nian nebe maka avansadu no nia hetan ona osan idosos husi governo, maibé ida ne’e sei la garante ba loron naruk nia laran,ho ida ne’e inan faluk ne’e husu ajuda ba governu atu bele ajuda netik nia.

“karik governo hakarak ajuda bele mai ajuda netik ba ha’u la husu tanba ida ne’e maka ha’u nia moris,”Nia rekomenda.

Iha sorin seluk Xefe Aldeia Raimean Alarico Sousa de Carvalho reforsa, nia parte rekonese inan faluk Mariana nia moris susar duni tanba nia parte buka ona solusaun ba problema ne’e, maibé seidauk iha rezultadu atu solusiona problema ne’ebé faluk ne’e enfrenta.

“Ha’u nia parte buka ona solusaun ba inan faluk nia problema maibe laiha resultadu no iha proposta balun ne’ebe ha’u  hatama iha MSSI sosial ajuda fo kalen,besi maibe agora ita hare ajuda nee kleur ona no komesa uma ne’e dodok dadaun ona,”hateten xefe aldeia.

Entretanu total dadus kbit laek iha aldeia Raimean suku Lahane oriental postu administrativu nain feto hamutuk 12 difisiente 11 no total uma kain 279.

Jornalista : Manuel Andrade

Editór        : Agapito de Deus