Lafaek News–Negosiante Armando Freitas ho tinan (65), faan sasán iha merkadu Manleuana dehan, kompradór ladun iha ikus mai rendimentu tun tanba impaktu husi konfinamentu obrigatóriu iha munisipiu Dili.
Negosiante Armando Freitas hateten katak relasiona ho konfinamentu obrigatóriu iha munisípiu Dili liu liu iha merkadu Manleuan negosiante sira faan sasan rendimentu tun liu tanba menus kompradores sira atu sosa.
“Estadu emerjénsia hahú husi dia 27 too agora ne‘e sasan ne’ebé mak ami Faan ne’e ema ladun sosa karreta mos la halai ne’e se mak atu mai sosa,” dehan Armando ba jornalista lafaek news iha merkadu Maleuana iha kinta semana ne’e
Nia hatutan tan momentu governu seidauk deside konfinamentu obrigatoriu sasan ne’ebé mak nia faan ne’e rendimentu sa’e, maibé agora tama ona ba konfinamentu obrigatoriu sasan ne’ebé mak nia fa’an ne’e rendimentu tun liu
“Seidauk tama ba konfinamentu obrigatóriu ne’e loron ida ha’u fa’an hetan 0san $ 80.00, maibé agora ne’e kuitadu loron ida tomak mai tur to’o fali kalan mos hetan deit 10.00 dolar dalaruma la too 10.00 dolar ida nee la to’o atu sustenta ami nia moris lorloron”,dehan nia
Iha fatin hanesan negosiante Aguida Xavier sente triste, tanba rendimentu tun liu no governu deside konfinamentu obrigatoriu dehan sidadaun hotu hotu tenke hakmatek iha uma nia.
“Triste liu tamba governu deside konfinamentu obrigatoriu dehan sidadaun hotu hotu tenke iha uma se ami iha de’it uma ne’e hahan tun husi lalehan de’it mai ka tun husi uma kakuluk de’it imi boot sira ne’e di’ak, tanba lor-loron simu osan, seidauk tama ba konfinamentu obrigatoriu sasan ne’ebe mak ha’u fa’an loron ida ema sosa to’o $.5.00 ba leten agora governu deside estadu emerjénsia sorti di’ak ema sosa 2.00 dolar dala ruma loron tomak ema la sosa mos iha,” nia hakotu
Jornalista : Domingas Viana
Editór : Agapito de Deus
